Është arrestuar një person i dyshuar si autori i shpërthimit në Stamboll, që la 6 viktima dhe 81 të plagosur.
Lajmin e ka bërë me dije ministri i Brendshëm, Süleyman Soylu, i cili mëngjesin e sotëm në një deklaratë për media tha se personi që hodhi bombën u ndalua nga ekipet e policisë së Stambollit. Ai është shprehur se dënimi për autorin që shkaktoi viktima do të jetë maksimal.
“Personi që hodhi bombën u ndalua nga ekipet e Departamentit tonë të Policisë së Stambollit. Ne e dimë se çfarë mesazhi duan të na japin ata që kryen këtë sulm. Ne e kemi marrë këtë mesazh, mos u shqetësoni, ne do të përgjigjemi më ashpër” tha ministri turk.
Kujtjmë që dje në media qarkulloi fotoja e një gruaje që shihej me një çantë shpine dhe dyshohej se ajo la bombën në vendngjarje dhe më pas u largua, por nuk dihet nëse është pikërisht gruaja në fjalë që është arrestuar apo hetimet kanë zbuluar se autori është një tjetër person.
Ndërsa nga shpërthimi humbën jetën 6 persona, ministri i Shëndetësisë Fahrettin Koca dha të dhënat e fundit për shpërthimin. Në profilin e tij në Twitter, ministri Koca tha se 39 nga 81 personat e plagosur nga shpërthimi në rrugën Istiklal u lanë pas përfundimit të trajtimit. 5 nga 42 pacientët e shtruar janë ende në terapi intensive.
