Një shpërthim i fuqishëm ndodhi në orët e para të së enjtes, në ditën e Krishtlindjeve, në një degë banke në Evosmos të Selanikut, duke shkaktuar dëme të konsiderueshme materiale dhe shqetësime për banorët e zonës. Incidenti u regjistrua rreth orës 03:20 jashtë degës së bankës, e cila ndodhet mes rrugëve Karaoli dhe Dimitriou. Sipas mediave greke, pajisja shpërthyese ishte vendosur pranë degës, në rrugën Salaminos.
Pas shpërthimit, u konstatuan dëmtime të shumta në degën bankare, përfshirë xhama të thyer dhe dëme serioze në brendësi. Po ashtu, automjetet e parkuara dhe pallatet përreth u dëmtuan gjithashtu. Fuqia e shpërthimit u ndje në një rreze të gjerë, dhe deri më tani, policia ka raportuar se nuk kishte ndonjë paralajmërim paraprak për incidentin.
Mediat greke sugjerojnë se objektivi i shpërthimit nuk ishin bankomatet, pasi pajisja ishte vendosur më larg tyre. Një ekip nga Departamenti i Asgjësimit të Municioneve Shpërthyese mbërriti në vendngjarje për të hetuar rrethanat e shpërthimit dhe për të kryer kontrolle në zonë. Hetimet policore janë ende në proces.
