Në vitin 2024, shqiptarët fokusohen kryesisht në shpenzimet për ushqim, sipas Anketës së Buxhetit të INSTAT. Grupi “ushqime dhe pije joalkoolike” zë rreth 40% të buxhetit familjar. Mesatarisht, një familje shqiptare me tre anëtarë harxhon rreth 360 euro për konsum ushqimor në muaj, ku 18.9% e shumës shkon për mish dhe nënproduktet e tij, e pasuar nga bukë dhe drithëra me 15.4%.
Përveç ushqimit, shpenzimet për mobilim dhe pajisje shtëpiake janë rritur me 5.7% krahasuar me vitin e kaluar. Këto shpenzime përfshijnë kryesisht pajisje për përgatitjen e kafesë dhe thekëse buke. Po ashtu, shpenzimet për argëtim dhe kulturë janë rritur, veçanërisht për “paketa turistike brenda dhe jashtë vendit”.
Megjithatë, shpenzimet për arsimin kanë pësuar një rënie në krahasim me vitin e kaluar, duke zënë vetëm 3.3% të buxhetit familjar. Ana Llazo thekson se ky fenomen lidhet me të ardhurat e ulëta dhe mungesën e informacioneve në zonat rurale mbi rëndësinë e arsimimit, duke nënvizuar shqetësimin për zhvillimin e shoqërisë.
Të dhënat tregojnë gjithashtu se shqiptarët shpenzojnë rreth 70 miliardë lekë për konsum në muaj. Mesatarisht, një familje harxhon 950 euro, që paraqet një rritje prej 1.5% krahasuar me vitin e kaluar. Tirana është qarku me shpenzimet më të larta, pasuar nga Korça dhe Durrësi, ndërsa Kukësi dhe Dibra evidentohen si zonat me shpenzime më të ulëta për konsum.
