Federata Shqiptare e Futbollit (FSHF) ka përfunduar procesin e aplikimeve për shortin e biletave të ndeshjes Shqipëri–Angli, e cila do të zhvillohet në nëntor. Pas mbylljes së afatit, FSHF ka filluar sot përzgjedhjen e fituesve që do të kenë mundësinë të ndjekin nga afër këtë përballje të rëndësishme, e vlefshme për Kualifikueset e Botërorit 2026.
Sistemi elektronik i FSHF-së ka përzgjedhur në mënyrë të rastësishme aplikantët fitues. Të gjithë ata që kanë aplikuar do të njoftohen me email lidhur me rezultatin e shortit, një praktikë që është ndjekur edhe në duelin e mëparshëm me Serbinë.
Një informacion i rëndësishëm për tifozët është se Shqipëria ka shanse për të siguruar matematikisht vendin në “Play Off” nëse arrin të fitojë ndaj Andorrës, ndërsa Anglia të mundë Serbinë në Londër. Kjo ndeshje përbën një moment të rëndësishëm për ekipin kuqezi në përpjekjet e saj për kualifikim në Botërorin e ardhshëm.
