Kreu i Shoqatës së Ndërtuesve, Luigj Aleksi ka kërkuar sot që taksa 3% e infrastrukturës që paguajnë ndërtuesit në Tiranë të hiqet. Sipas tij, këtë taksë e merr Bashkia e Tiranës dhe nuk shkon as për rritje pagash e pensionesh.
“Shqipëria është Shqipëri, dhe Tirana është Tiranë. Por dihet që në tiranë banon 40-50% përqind e popullatës. Nëse ndërtuesi do të shkojë të ndërtojë gjëkund tjetër po banorët e Tiranës pse duhet të paguajnë 400 apo 500 euro taksë infrastrukture që këtë infrastrukturë nuk e bën bashkia por ndërtuesi. Dhe kjo duhet të parapaguhet.
Kjo taksë i shkon bashkisë. Se po ti shkonte buxhetit të shtetit për pensione më të larta, për pedagogët, arsimtarët etj do të ishte gjysma e të keqes. Po i shkon bashkisë së Tiranës. Kjo taksë nuk ka një bazë logjike. Të hiqet taksa 3%”, tha Aleksi, në një konferencë të përbashkët me Dhomën e Tregtisë.
Më tej, kreu i Shoqatës së Ndërtuesve tha se edhe taksa e dherave që aplikohet nga Bashkia e Tiranës është e jashtëligjshme. Po ashtu, dhe taksa e strehimit social, e cila nëse hiqet, sipas Luigj Aleksit do të ndikojë direkt në uljen e çmimeve.
“Unë thashë vetëm një taksë. Por eshtë edhe taksa e dherave që eshtë e jashtëligjshme edhe në kundërshtim me VKM. Po kështu është taksa e strehimit social. Që rrit 35-40% atë që ndërtuesi e jep si taksë. Dhe sigurisht që cmimi i shitjes, do bien nëse reduktohen taksat.
Beteja ka kohë që ka filluar. Dy janë në gjykatë kushtetuese dhe një në proces trajtimi juridiksht për një farë kohe ju e dini që mungonte gjykata kushtetuese. Po mundohemi të kapim kohën”, vijoi ai.
Gjatë takimit të organizuar nga Dhoma e Tregtisë u fol dhe për nismën e ndërmarrë nga qeveria për amnistinë fiskale. Kreu Nikolin Jaka tha se ajo është moralisht e padrejtë, sepse duhet të garantohet sipërmarrja e ndershme, në të kundër do të jetë vetëm show.
“Ka 12 vjet për amnistinë fiskale. Kemi shpenzuar kohë dhe ekspertë që kanë bërë një draft me precedentët e vendeve të tjera, Spanja, Greqia, Italia etj. Megjithëse ne u fokusuam për këtë draft qeveria heshte. Më pas kaloi një ligj në parlament të pakonsultuar me ne.
Dhe tani kemi një draft por ende nuk është ulur me grup interesi për të parë. Moralisht është e padrejtë. Por cdo sipërmarrës i ndershëm përvec pasojave që ka pasur duke konkurruar sipërmarrjet informale e pranon më mirë që të amnistohet kjo sipërmarrje për tu futur në garën e ligjshmërisë.
Që të mos dekurajohet sipërmarrja private duhet që instrumentat e institucioneve përgjegjëse për amnistinë dhe luftën pa kompromis ndaj informalitetit të jenë evidente në amnistinë fiskale. Unë nuk di që të ketë instrumenta të tilla pas kësaj amnistie. Duhet të kuptojmë kush janë problemet. Sipërmarrja private ka për të deklaruar dhe për të qenë pjesë e saj, por është e rëndësishme që të garantohet sipërmarrje e ndershme. Ndryshe do të jetë show i rradhës”, u shpreh Nikolin Jaka, kreu i Dhomës së Tregtisë.
Ndërkohë, kryetari i Shoqatës së Eksportuesve, Alban Zusi është shprehur se kanë rënë eksportet me Kosovën. Pjesëmarrës në këtë konferencë, ai tha se një vit më parë fabrikat e tullave eksportonin 40% në Kosovë, ndërsa sot janë zero.
“Rënia e eksporteve në Kosovë. Deri para 1 viti fabrikat e tullave 40% e eksportinin në Kosovë. Sot është 0. Ky është zëvendsuar nga kompanitë kosovare që kanë filluar të hyjnë dhe në tregun shqiptar. Por ka edhe një arsye. Kostoja e lartë fiskale e lëndëve të para të rritura të përballuara nga biznesi shqiptar e ka bërë jokonkurrues disa muajsh me industrinë kosovare. Kjo u shpërnda në gjithë popullsinë. Rezultati është që humbëm një treg të sigurt.
Në 6 mujorin e parë kemi humbur 30% të eksportit të fruta perimeve. Në këtë 6 mujor do humbasim 50%. Nuk jemi zëvendësuar nga prodhuesit kosovar por nga prodhuesit turq. Edhe këtu një treg yni zëvendësohet. Sepse politika që u ndoq në këto 8 muaj nga qeveria që biznesi të përballojë i vetëm barrën fiskale po con në uljen e prodhimit dhe humbjen e tregjeve, sidomos eksporti. Urgjentisht përmes paketës fiskale. Nuk është produktive rritja e penalitetetve por duhet të shkojë në uljen e barrës fiskale apo rishpërndarje të saj për të mos humbur tregjet.
Dhe tjetra, dështuam për të formalizuar ekonominë në fiskalizim. Do të dështojmë edhe me amnistinë nëse nuk formalizohemi. Madje më parë duhet të formalizohemi. Sot duhet të paguajmë të gjithë përmes instrumentave të tregut dhe jo me kamzhik. Sepse do të jemi një ekonomi magazinë e produkteve evropiane”, tha Alban Zusi.
