SPAK konkretizoi një hetim dyvjeçar me arrestimin e Sokol Idrizajt dhe katër anëtarëve të familjes së tij nën akuzën e përfshirjes në trafikun dhe kontrabandën drejt Shqipërisë të sendeve me vlerë.
Hetimi dyvjeçar u përmbyll me arrestimin e Idrizajt, që deri pak ditë më parë ishte shoferi personal i kreut të Agjencisë së Mbikëqyrjes Policore, Ardi Veliu.
Arrestimi i tij nuk bën me përgjegjësi të drejtpërdrejt penale Ardi Veliun, por përgjegjësia morale ndaj kreut të AMP-së është e stërmadhe. Idrizaj është një prej njerëzve më të besuar të Ardi Veliut, që e ka pasur shofer personal që në kohën kur drejtonte policinë e Tiranës, më pas policinë e shtetit dhe në fund Agjencinë e Mbikëqyrjes policore.
Idrizaj është shkarkuar vetëm kohët e fundit, nën dyshimet pasi Ardi Veliu u njoh me vendimin e SPAK për mbylljen e dosjes dhe prerjen e urdhër-arrestit për të. Me këtë vendim, Ardi Veliu kërkoi të shkëpuste lidhjen e ngushtë me ndihmësin e tij, të paktën nga njoftimi zyrtar i SPAK për këtë aksion.
Por a mund ta shkëpusë dot jozyrtarisht këtë lidhje? Duke lënë mënjanë zërat se Sokol Idrizaj paraqitej në emër të Ardi Veliut nëpër dogana kur tërhiqte dërgesat me mallrat kontrabandë, Ardi Veliu ka përgjegjësi të madhe, në mos penale, të paktën morale. Morale sepse me gjasë ka qenë në dijeni prej dy vitesh për hetimin e SPAK ndaj shoferit të tij dhe së dyti, sepse nuk e largoi atë.
Tani që bomba i shpërtheu në dorë, a është morale që njeriut të cilit shoferi i trafikonte sende me vlerë mijëra euro dhe të grabitura në vendet e BE-së të ketë në dorë kontrollin etik e antikorrupsion në radhët e 11 mijë punonjësve të policisë?
Sa të besueshme mund të jenë në vijim aksionet antikorrupsion të AMP-së në radhët e policisë së shtetit, në një kohë që kreut të agjencisë i është arrestuar krahu i tij i djathtë dhe jo për akuza korrupsioni të rëndomtë, por për pjesë të një grupi kriminal të trafikut të sendeve me vlerë, të vjedhura në shtetet e BE-së.
Pikërisht për këtë arsye, Ardi Veliu duhet të japë menjëherë dorëheqjen nga posti i drejtorit të Agjencisë së Mbikëqyrjes Policore, sepse me aksionin e SPAK ka njollosur emrin e vetë kësaj agjencie.
©Copyright Vox News
