Shpërthimi në makinën e biznesmenit Genti Sauku, pranë Gardës së Republikës, dyshohet se ka qenë një atentat në vazhdim të plagosjes së biznesmenit Dritan Avllaj.Policia e Tiranës ka dyshime se dy ngjarjet, ndonëse në dukje të ndryshme e pa lidhje me njëra-tjetrën, në fakt kanë pasur të njëjtat motive. Shkak dyshohet se kanë qenë negociatat për një leje ndërtimi për kompaninë e biznesmenit Genti Sauku. Leja ishte marrë përsipër të nxirrej nga Tan Lepri, i cili mbrëmjen e 24 marsit u plagos me një plumb në shpatull, pasi u qëllua gjashtë herë me armë zjarri. Ky është konkluzioni paraprak në të cilin ka arritur grupi hetimor i oficerëve të Krimeve Kundër Jetës, të cilët kanë gjetur një emërues të përbashkët mes dy ngjarjeve. Sipas burimeve nga grupi hetimor, e përbashkëta është pikërisht një kompleks pallatesh pranë të cilit u plagos Dritan Avllaj, i njohur si Tan Lepri, mbrëmjen e datës 24 mars. Plagosja mësohet se ka ndodhur në afërsi të Tregut Elektrik në Tiranë, fare pranë kompleksit të ndërtimit të biznesmenit Genti Sauku. Nga hetimet rezulton se kompleksi i pallateve, në barin e katit të parë të të cilit ndodhej Avllaj para atentatit, është në pronësi të biznesmenit Genti Sauku. Pikërisht, vetëm katër ditë pas plagosjes së Dritan Avllajt, ndodh shpërthimi pranë Gardës së Republikës, pas vendosjes së një sasie eksplozivi në makinën tip “Audi Q7”, në pronësi të Saukut. Ndërtuesi Sauku ndodhej për një udhëtim pune në Itali natën kur ndodhi shpërthimi dhe nga ngjarja mbeti i plagosur shoferi dhe miku i tij, ish-polici Altin Bega.
DY ATENTATET
Sipas grupit hetimor që po verifikon të gjitha provat dhe gjurmët e gjetura në atentatin kundër Tan Leprit dhe shpërthimin në makinën e Genti Saukut katër ditë më pas, rezulton se gjatë hetimeve kanë dalë në pah disa pika të përbashkëta. Nga të dhënat hetimore ka rezultuar se përveç negociatave që dyshohet se Dritan Avllaj po kryente me disa persona në lokalin e Saukut mbrëmjen e atentatit për një leje ndërtimi, pranë vendit të ngjarjes është parë edhe makina që shpërtheu katër ditë më vonë, më 28 mars. Për këtë arsye, motivet e ngjarjeve po verifikohen në dy drejtime nga ana e grupit hetimor. Së pari, si dy ngjarje që kanë ndodhur për të kundërshtuar lejen e ndërtimit dhe, së dyti, që policia të mos binte në gjurmët e autorëve që plagosën Tan Leprin. Këtë të fundit policia e shpjegon me dyshimet se atentatorët e Avllajt, pasi kanë parë makinën tip “Audi Q7”, mund të kenë dyshuar se brenda saj duhet të ketë pasur persona që mund t’i kenë parë kur kanë qëlluar me armë.
Dëshmia e Tan Leprit
Pas atentatit të 24 marsit, ku Dritan Avllaj mbeti i plagosur, ai mësohet të ketë deklaruar në polici se nuk ka konflikte me asnjë person që mund të tentonte ta vriste dhe aq konflikte sa ai mund të ketë, janë bërë publike në media. Gjithashtu, Tan Lepri ka deklaruar se ndodhej në ndenjësen e parë të makinës dhe plumbat në drejtim të tij janë pritur nga televizori që ndodhej në ndenjësen e pasme, duke e shpëtuar nga vrasja.
Dëshmia e Genti Saukut
Sipas burimeve nga Policia e Tiranës, biznesmeni Genti Sauku, makina e të cilit shpërtheu nga një sasi eksplozivi e vendosur poshtë saj, në afërsi të Gardës së Republikës më 28 mars, është kthyer dy ditë më parë nga Italia, ku ndodhej për arsye pune. Ai është thirrur dje për t’u marrë në pyetje rreth ngjarjes nga grupi hetimor, por sipas të dhënave paraprake mësohet se ka deklaruar që nuk ka asnjë konflikt me askënd.
Sauku iku në Itali një ditë para atentatit ndaj Avllajt
TIRANE – Policia ka pohuar se nga të dhënat që janë siguruar nga grupi hetimor, të pranuara edhe nga vetë biznesmeni Genti Sauku, ai rezulton se ka udhëtuar drejt Italisë për arsye pune më 23 mars 2011. Kjo datë e udhëtimit të tij për në Itali rezulton një ditë para se të ndodhte atentati kundër Dritan Avllajt. Shpërthimi në makinën e tij tip “Audi Q7”, me targa amerikane, ndodhi pesë ditë pasi ai ishte larguar, më 28 mars, dhe në momentin e ngjarjes makina përdorej nga shoferi i tij, ish-polici Altin Bega. Ndryshe nga drejtimi që kishte marrë hetimi i çështjes së shpërthimit pranë Gardës, që fillimisht iu faturua drejtuesit të mjetit, Bega, tashmë hetimet janë shtrirë në disa mosmarrëveshje që ka pasur në të shkuarën për çështje pronash vetë biznesmeni Genti Sauku. Grupi hetimor u tregua i rezervuar në lidhje me argumentimin që Sauku i ka bërë ngjarjes së ndodhur në kohën kur ai nuk ndodhej në Shqipëri, duke publikuar vetëm deklaratën e tij se nuk kishte konflikte me njeri. Fillimisht, grupi hetimor siguroi të dhëna për shoferin e dëmtuar në këmbë, Altin Bega, i cili ka qenë punonjës policie, duke dyshuar se shënjestra e shpërthimit ishte pikërisht ai. Gjatë deklaratës së tij ai u pyet për konfliktet që ka pasur në punë, por edhe jashtë saj, për të parë nëse objektivi ka qenë ai apo pronari i mjetit, Genti Sauku. Tashmë hetimi ka marrë një tjetër drejtim, duke lënë në hije ish-policin Bega dhe i dyshuar si objektiv i mundshëm i ngjarjes, sipas policisë, mund të jetë biznesmeni Sauku. Nga të dhënat e mbledhura nga ana e grupit hetimor rezulton se ai është kthyer në Shqipëri dy ditë më parë dhe menjëherë ka takuar shoferin dhe mikun e tij, Altin Bega, duke e pyetur me imtësi për atë çfarë kishte ndodhur. Por mësohet se takimet me oficerët e grupit hetimor të Genti Saukut nuk do të mbyllen vetëm me atë të djeshmin, pasi me sigurimin e provave të reja nga ana e policisë ai do të thërritet sërish për të dëshmuar, madje edhe për lidhjet e tij me biznesmenin Dritan Avllaj.
