Një ditë pas protestave të banorëve pranë vend-depozitimit të mbetjeve të rrezikshme industriale, specialistë të mjedisit konfirmuan shqetësimet e tyre, duke theksuar se kontenierët janë të rrezikuar nga dëmtimi dhe faktorët atmosferikë. Analizat laboratorike të kryera në Itali kanë vërtetuar se mbetjet industriale të rikthyera në Shqipëri dhe depozituara në Porto Romano janë toksike dhe rrezikojnë shëndetin e njeriut dhe mjedisin.
Specialistët paralajmërojnë se këto mbetje nuk mund të depozitohen apo riciklohen siç janë aktualisht, por duhet të kalojnë në një trajtim të specializuar përpara çdo depozitimi përfundimtar, sipas standardeve ndërkombëtare. Ka një kërkesë urgjente për një vendimmarrje të shpejtë mbi këto mbetje, si dhe për një zgjerim të hetimeve për të sqaruar se çfarë do të ndodhë me tonelatat e mbetjeve të rrezikshme, prodhim i aktiviteteve të kompanisë Kurum dhe të tjerave në vend.
Hetimi penal ka zbuluar një zinxhir shkeljesh, duke çuar në kërkimin e masave të sigurimit për 33 individë. Megjithatë, mbi 2800 ton mbetje të rrezikshme vazhdojnë të qëndrojnë në Porto Romano, pa një vendim të qartë për trajtimin e tyre. Kjo situatë përbën një kërcënim serioz për shëndetin e banorëve dhe ekosistemin e zonës. Për ata që jetojnë aty, çështja nuk është më vetëm një problem ligjor, por një rrezik konkret për jetën e tyre.
