12 gra u vranë gjatë 2023-it, ndërkohë që prej vitit 2010 dhe deri më tani, 159 gra kanë qenë viktima. Në ditën ndërkombëtare të gruas, shifrat e vrasjeve dhe dhunës janë trishtuese.
Vetëm për vitin 2023 rezultojnë 12 gra dhe vajza të vrara, ku 10 prej tyre brenda marrëdhënieve në familje dhe 2 nga persona të tjerë, ndërsa 5 raste mbetën në tentativë.
“Fatkeqësisht vrasja e grave dhe vajzave është forma më ekstreme e dhunës. Ndryshimi në thelb do vije kur ne të edukojmë djem dhe vajza”, tha në një deklaratë për shtyp Avokatja e Popullit, Erinda Ballanca.
Ndërsa Ministri i Brendshëm Taulant Balla tha se në Shqipëri kemi një fenomen femicidi shqetësues, ku problem janë edhe rastet që nuk raportohen, kryesisht për shkak të stigmës.
“Shifrat që po japim sot janë vetëm maja e ajsbergut, duke menduar edhe rastet që nuk denoncohen”, tha Balla.
Në 2024, në vetëm dy muaj (Janar-shkurt) janë 629 vajza dhe gra që kanë denoncuar dhunë në një total prej 890 denoncimesh.
Një panoramë tragjike është edhe në kërkesat për urdhër mbrojtje.
Nga 465 të dëmtuar që kanë marrë urdhër mbrojtje, 350 janë vajza dhe gra, shkruan si.
Një element tjetër janë edhe krimet seksuale nga të cilat kemi 125 denoncime dhe nga këto, 103 janë gra dhe vajza.
Ministri Balla deklaroi se apartament e konfiskuara të krimit do t’i vihen në dispozicion grave dhe vajzave të dhunuara. Balla tha se po bashkëpunohet me organizata jo qeveritare për gratë, por dhe me donatorë për të mbledhur fonde që të vënë në jetë një projekt të tillë.
Në 1 mars të 2023 u shënua një prej masakrave më të rënda në vend. Mevlute Hysa, Hasime Dafku dhe Etleva Kurti u vranë brenda ditës nga Dan Hutra. Ai gjithashtu plagosi me thikë Marjana Gurakuqin, Elena Hysën së bashku me mamanë e saj.
Më 8 prill 2023, Roland Sinani ishte personi që i mori jetën kunatës së tij, 37-vjeçares Migena Sinani e cila ishte duke fjetur me vajzën e saj 2-vjeçare.
Në shtator 2023, një sherr mes dy motrave në Tiranë agravoi deri në vrasje. 37-vjeçarja Amanda Pushani u vra nga motra e saj 40-vjeçare me profesion mësuese e Gjuhës Shqipe.
Ndërkohë, Merushe Gjuzi ndërmori aktin fatal të vetëvrasjes për shkak të konflikteve të vazhdueshme me bashkëshortin e saj. 55-vjeçarja u hodh nga furgoni në rrugën Peqin-Elbasan dhe nuk arriti t’i mbijetonte plagëve të marra.
Dy rastet e fundit ishin ai i Bedrie Lokës dhe Sibela Abedini.
Bedrie Loka, nënë e 4 fëmijëve i dha fund jetës në banesën e saj, duke u vetëhelmuar për shkak të bullizimit në rrjetet sociale ndërsa publikimi i një fotoje intime u bë shkak për vetëvrasjen e 27-vjeçares në Tiranë, Sibela Abedini.
Kjo e fundit u hodh nga tarraca e pallatit ku jetonte në Kamëz.
