Ministria e Mbrojtjes e Rumanisë ka njoftuar mbi rishikimin e dislokimit të trupave amerikane në krahun lindor të NATO-s, duke theksuar se ky proces është pjesë e vlerësimit global të forcave ushtarake të SHBA-së. Në njoftimin e saj, datuar më 29 tetor, ministria sqaron se ndër elementet që do të pezullohen janë edhe forcat e dislokuara në bazën Mihail Kogalniceanu.
Ministria e Mbrojtjes thekson se ky vendim ishte i pritshëm për shkak të vazhdimit të kontakteve mes Rumanisë dhe SHBA-së si partner strategjik. Rishikimi i forcave amerikane lidhet me prioritetet e reja të administratës amerikane, të shpallura që nga shkurti, dhe është gjithashtu rezultat i forcimit të pranisë së NATO-s në krahun lindor, që lejon SHBA-në të përshtasë pozicionin e saj ushtarak në rajon.
Vendimi i amerikanëve përfundon rotacionin e një brigade që kishte elemente ushtarake në disa shtete të NATO-s. Sipas Ministrisë rumune, rreth 1,000 ushtarë amerikanë do të qëndrojnë të dislokuar në Rumani, duke kontribuar në parandalimin e kërcënimeve dhe përfaqësuar angazhimin e SHBA-së për sigurinë rajonale.
Ky njoftim erdhi pas spekulimeve për një tërheqje të trupave amerikane nga krahu lindor i NATO-s. Gazeta ukrainase Kyiv Post raportoi se aleatët e NATO-s ishin informuar për këtë vendim dhe se ishin diskutuar reduktime të personelit në disa vende përfshirë Poloninë, por vendimi preku vetëm Rumaninë.
Nuk ka informacione të sakta nga autoritetet e Bukureshtit ose ato amerikane mbi numrin aktual të ushtarëve amerikanë në Rumani. Në fillim të vitit 2025, numri i tyre ishte më shumë se 1,700, kryesisht të dislokuar në bazat Mihail Kogalniceanu, Deveselu dhe Campia Turzii. Ministri i Mbrojtjes, Ionut Mosteanu, vlerëson se në Mihail Kogalniceanu janë afërsisht 2,000 ushtarë amerikanë dhe pret që Strategjia Kombëtare e Mbrojtjes së SHBA-së, e cila do të prezantohet së shpejti, të sqarojë më tej pozitat e SHBA-së në këtë rajon.
