Shtetet e Bashkuara kanë hequr ish-liderin e serbëve të Bosnjës, Millorad Dodik, dhe anëtaren e Presidencës së Bosnjës, Zhelka Cvijanoviç, nga lista e sanksioneve, siç njoftoi Departamenti i Thesarit. Kjo heqje përfshin gjithashtu anëtarët e familjes së Dodikut, kompanitë e tyre dhe bashkëpunëtorët e ngushtë.
Dodik, president i Aleancës së Social Demokratëve të Pavarur, ishte sanksionuar dy herë për shkelje të Marrëveshjes së Dejtonit për Paqe. Gjithashtu, autoritetet amerikanë kanë hequr nga lista e sanksioneve 48 individë dhe subjekte juridike të tjera, të cilët ishin sanksionuar sipas Programit të Sanksioneve për Ballkanin Perëndimor.
Një javë më parë, zyra OFAC hiqte nga lista katër individë nga Republika Sërpska, të lidhur me organizimin e festimeve të ditës antikushtetuese të 9 janarit. Emrat e tyre janë Danijela Dragiçeviç, Jelena Pajiç Bastinac, Dijana Millankoviç dhe Goran Rakoviç.
Në dhjetor të vitit të kaluar, autoritetet e Republikës Sërpska nënshkruan një kontratë me firmën ligjore amerikane “Zell & Associates International Advocates” për të lobuar për heqjen e sanksioneve ndaj Dodikut dhe Cvijanoviçit. Kjo kontratë synon gjithashtu të promovojë dialogun mes administratës së Republikës Sërpska dhe Donald Trump-it, si dhe të rishikojë Marrëveshjen e Dejtonit dhe rolin e Përfaqësuesit të Lartë në Bosnjë.
Sipas një dokumenti, firma ligjore do të arrijë këto qëllime përmes komunikimit me përfaqësuesit e autoriteteve lokale dhe sektorit joqeveritar në SHBA. Më parë, kontratat e Republikës Sërpska me firma lobimi dhe avokatie në SHBA janë përqendruar në promovimin e investimeve dhe ofrimin e këshillave ligjore, me kosto që arrijnë dhjetëra mijëra dollarë në muaj.
