Një nënë nga Utah, Ellie Anne Seymour, është filmuar duke udhëhequr katër fëmijët e saj në Aeroportin Ndërkombëtar të Salt Lake City-t, përpara se të hipte në një fluturim ndërkombëtar dhe të zhdukej. Autoritetet e SHBA thonë se 35-vjeçarja ka shkelur marrëveshjet e kujdestarisë, duke organizuar udhëtimin në fshehtësi, pa dijeninë e baballarëve të fëmijëve. Ajo përballet me katër akuza lidhur me kujdestarinë.
Seymour dyshohet se është larguar nga një frikë e pabazuar për një “ngjarje biblike” që do të shënonte fundin e kohërave. Hetuesit raportojnë se planet për largim ishin përgatitur disa javë përpara udhëtimit. Pamjet nga aeroporti tregojnë Seymour dhe fëmijët duke udhëtuar për në Amsterdam, me destinacion përfundimtar Kroacinë. Më vonë, ajo i dërgoi një mesazh zanor babait të fëmijëve, duke thënë se ndodhej në Francë dhe kishte për qëllim të kërkonte vendbanim të përhershëm atje.
Në banesën e saj, hetuesit gjetën një fletore me shënime që përshkruan planet për të shkatërruar dokumentet dhe hedhur telefonat para udhëtimit, si dhe për marrjen e pasaportave për fëmijët. Kendall Seymour, babai i tre prej fëmijëve, shprehu shqetësimin e tij për gjendjen e nënës së fëmijëve dhe kërkoi që urdhri i arrestit të kthehet në një urdhër federal dhe ndërkombëtar.
Kendall fundit ka parë fëmijët më 24-25 nëntor, para se ata të shkonin te nëna për kujdestari. Dyshimet janë rritur pas një telefonate nga edukatorja se fëmijët nuk ishin paraqitur në çerdhe. Ai shprehu tronditjen e tij për bindjet fetare dhe frikën e “fundit të botës” të Seymour, duke theksuar se nuk kishte parë shenja të tilla gjatë martesës.
Sipas dokumenteve, dëshmitarët kanë raportuar se Seymour ka përjetuar kriza emocionale dhe halucinacione, duke çuar në një urdhër arresti pa mundësi lirimi me kusht. Më 10 dhjetor, policia e shpalli atë si person të zhdukur dhe akuzat për shkeljen e kujdestarisë u ngritën gjashtë ditë më vonë. Avokati i së drejtës familjare, Marco Brown, theksoi se Seymour mund të përballet me pasoja të rënda ligjore, por që shëndeti i saj mendor mund të ndikojë në vendimin gjyqësor.
Autoritetet janë duke bashkëpunuar me FBI-në dhe agjencitë ndërkombëtare të zbatimit të ligjit për gjetjen e saj dhe të fëmijëve.
