Administrata e qytetit të Romës ka vendosur një tarifë hyrjeje prej dy eurosh për ata që duan të afrohen prapa bordurës së Shatërvanit të Trevi, një nga monumentet më të njohura të kryeqytetit italian. Kjo masë e re, që hyn në fuqi më 2 shkurt, ka si qëllim rregullimin e fluksit të madh të vizitorëve dhe mbrojtjen e monumentit.
Shatërvani vizitohet çdo ditë nga dhjetëra mijëra njerëz, që vijnë për të bërë fotografi ose për të hedhur monedha në ujë. Ndërsa hyrja në zonën përreth bordurës do të kushtojë, sheshi i madh para shatërvanit do të mbetet i lirë për t’u vizituar. Autoritetet romake theksojnë se kjo tarifë ka për qëllim të menaxhojë më mirë numrin e vizitorëve dhe të parandalojë tejmbushjen e zonës, duke përmirësuar përvojën e të gjithë atyre që dëshirojnë ta vizitojnë këtë atraksion.
Sipas rregullores së re, përjashtohen banorët e Romës, personat me aftësi të kufizuara dhe ata që i shoqërojnë, si dhe fëmijët nën gjashtë vjeç. Gjithashtu, administrata e qytetit kishte më parë shpallur kufizime për numrin e vizitorëve pranë Shatërvanit, duke lejuar maksimumi 400 persona në të njëjtën kohë.
Vitin e kaluar, Shatërvani i Trevi u vizituar nga më shumë se dhjetë milion njerëz, me numra që arrinin deri në 70,000 në ditët më të ngarkuara. Tradita e hedhjes së monedhave në shatërvan për të shprehur dëshira filloi në vitin 1954, e frymëzuar nga filmi “Three Coins in the Fountain”.
Kjo masë e re është një përpjekje për të mbrojtur një prej simboleve më të dashura të Romës dhe për të ruajtur magjinë që ai ofron për vizitorët.
