Real Madrid ka shprehur një reagim të ashpër ndaj vendimit për të zhvilluar ndeshjen e javës së 17-të të La Ligës ndërmjet Villarreal dhe Barcelonës jashtë Spanjës, specifikisht në Miami më 12 dhjetor. Klubi “los blancos” e ka cilësuar këtë veprim si një vendim të njëanshëm dhe të papranueshëm, duke theksuar se nuk është bërë asnjë konsultim paraprak me klubet e tjera të përfshira.
Në një deklaratë të publikuar, Real Madrid argumenton se një lëvizje e tillë shkel parimin e reciprocitetit territorial, që është thelbësor për kampionatet me dy raunde, dhe krijon një avantazh të padrejtë për disa klube në dëm të të tjerëve. Klubi pohon se “çdo ndeshje duhet të luhet në të njëjtat kushte për të gjitha skuadrat” dhe se ndryshimi i këtij rregulli i rrezikon barazinë dhe legjitimitetin e rezultateve. Në këtë kontekst, ata shprehin shqetësimin se kjo mund të hapë dyer për përjashtime që kanë interesa jashtë sportit.
Në përpjekjet për të bllokuar këtë vendim, Real Madrid ka ndërmarrë tre hapa konkretë. Së pari, ata kanë kërkuar nga FIFA që të mos e autorizojë ndeshjen pa miratimin unanim të të gjithë klubeve të përfshira. Së dyti, klubi i ka bërë thirrje UEFA-s për të riafirmuar kriteret e vitit 2018, të cilat parashikojnë që ndeshjet zyrtare vendase të mos zhvillohen jashtë vendit, përveç rasteve të jashtzakonshme. Së fundmi, ata kanë kërkuar nga Këshilli i Lartë të Sportit në Spanjë që të mos japë lejen administrative të nevojshme për zhvillimin e ndeshjes.
Real Madrid ka theksuar se do të vazhdojë të mbrojë integritetin e garave përmes çdo organi kompetent dhe paralajmëron se ky vendim mund të përbëjë një pikë kthese për futbollin nëse pranohet. Kjo ndeshje midis Villarrealit dhe Barcelonës ka shkaktuar një debat të madh mbi rregullat dhe drejtësinë në futbollin profesional.
