SHBA- Presidenti amerikan, Donald Trump ka zhvilluar sot një konferencë për mediat lidhur me zhvillimet e fundit në SHBA dhe jo vetëm.
Gjatë fjalës së tij, Trump ka folur lidhur me vendet që rrezikojnë të konfliktohen, ku përfshiu dhe Serbinë dhe Kosovën. Ai tha se këto dy shtete ishin gati të përplaseshin, por nuk ndodhi për shkak të ndërhyrjes së tij. Trump tha se i kishte paralajmëruar të dy vendet se nëse përplaseshin nuk do të kishin më tregti me SHBA-në.
Më tej shtoi se e njëjta gjë kishte ndodhur dhe me Indinë dhe Pakistanin, ku tha se kishte negociuar me të dy palët për të shmangur përplasjen e tyre.
“Serbia dhe Kosova ishin gati të përplaseshin. Po shkonte drejt një lufte të madhe. U thashë: Nëse përplaseni, nuk ka më tregti me Shtetet e Bashkuara. Ata thanë: Ndoshta nuk do të përplasemi. Kështu ndodhi edhe me Indinë dhe Pakistanin të cilat po shkonin drejt një konflikti bërthamor. Po negocioja me të dyja palët. Dhe i thashë Scott-it, i thashë Howard-it: Anuloni të gjitha marrëveshjet me Indinë dhe Pakistanin. Nuk do të tregtojnë me ne nëse janë në luftë. Ata telefonuan prapë: Çfarë të bëjmë?
U thashë: Shikoni, nëse doni tregti me SHBA-të, shumë mirë. Nëse doni të filloni të përdorni armë bërthamore kundër njëri-tjetrit, nuk do ta lejojmë këtë. Dhe të dyja palët ranë dakord. Të dyja kanë udhëheqës të mirë. Ranë dakord të mos e bëjnë. E ndaluam. Bëmë shumë punë. Por ne kemi bërë punë të shkëlqyer. Nuk e di nëse ka pasur ndonjë president që ka bërë më shumë se kaq. Presidenti Putin më telefonoi dhe tha: Do të doja shumë të të ndihmoja me Iranin. I thashë: Më bëj një nder. Iranin do ta zgjidh unë. Më ndihmo me Rusinë. Duhet ta zgjidhim këtë çështje,” tha Trump.
