Ministri i Bujqësisë i Serbisë, Dragan Glamoqiç, njoftoi se Kina dhe Serbia po thellojnë partneritetin strategjik përmes bashkëpunimit në teknologjitë hapësinore. Në seminarin e parë kinezo-serb në këtë fushë, ai theksoi se teknologjitë hapësinore janë thelbësore për industrinë moderne dhe transformimin digjital, duke ofruar zgjidhje me rëndësi të gjatë për shoqërinë dhe ekonominë. Sipas tij, zbatimi i këtyre teknologjive mund të rrisë sigurinë ushqimore dhe qëndrueshmërinë e sektorit bujqësor.
Gjatë takimit në Beograd, u hap edhe Qendra e Përbashkët të Inovacionit për teknologjitë ajrore dhe hapësinore. Glamoqiç përmendi se vëzhgimi satelitor dhe bujqësia me precizion do të avancojnë prodhimin bujqësor. Ai përcaktoi se Serbia posedon staf profesionist dhe institucione kërkimore, ndërsa Kina ofron zgjidhje teknologjike të avancuara.
Në këtë ngjarje morën pjesë ekspertë nga Instituti Politeknik i Harbinit në Kinë, i njohur për kërkimet në teknologjitë hapësinore. Po ashtu, Ministria e Punëve të Brendshme e Serbisë njoftoi për vizitën e një delegacioni nga Kina që kishte për qëllim shkëmbimin e përvojave në komunikimin me publikun.
Serbia, e cila ka qenë kandidate për anëtarësim në Bashkimin Evropian që nga viti 2012, ka zhvilluar një bashkëpunim të ngushtë me Kinën, sidomos pas ardhjes në pushtet të Partisë Progresive Serbe. Brukseli ka paralajmëruar Serbinë se duhet të harmonizojë politikën e saj të jashtme me atë evropiane, ndëra që Serbia ka nënshkruar marrëveshje për bashkëpunim strategjik me Kinën, përfshirë marrëveshjen për ekstradim dhe forcimin e bashkëpunimit në media.
Kina, duke u renditur pas BE-së, është investitori i dytë më i madh në ekonominë serbe, me një shkëmbim tregtar që arriti në 5.7 miliardë euro për 10 muajt e parë të vitit 2024. Serbia ka blerë gjithashtu sisteme mbrojtjeje dhe dronë nga Kina, duke e bërë atë një vend të rëndësishëm në kontekstin ushtarak evropian.
Presidenti i Serbisë, Aleksandar Vuqiç, ka vizituar Pekinin disa herë dhe ka njoftuar përgatitjet për një vizitë të re zyrtare, pas pjesëmarrjes së tij në shënimin e 80-vjetorit të fitores në Luftën e Dytë Botërore.
