TIRANË- Avokati i gazetarit Elton Qyno, Dorian Matlia tha se nga kontrollet e Prokurorisë së Posaçme në banesë u terrorizuan familja dhe fëmijët. Sipas Matlisë, “hataja” u bë për të treguar se çfarë ndodh kur merresh me SPAK.
Ai u shpreh se në këtë çështje kemi të bëjmë me shkelje të procesit ligjor. Avokati shtoi se SPAK, si institucion shtetëror duhet të hetojë mekanizmat dhe jo të shkojë te gazetari për përgjigje. Më tej tha se po rrezikohen burimet konfidenciale të gazetarëve pa të cilat nuk mund të ketë gazetari cilësore.
“Janë terrorizuar fëmijët dhe është bërë një hata për të treguar se çfarë ndodh kur merresh me SPAK. Në rastin konkret nuk po flitet për të drejtën e tij për të shkruar. Po bëhet fjalë për të drejtën e tij për të mos treguar. Kemi të bëjmë me shkelje të rregullt të procesit ligjor. SPAK ka shkuar direkt te sekuestrimi. Në këtë pikë iu drejtua Gjykatës Kushtetuese. Kjo është si loja “Mafia”, të gjejmë se kush nga në është mafiozi. Institucioni shtetëror heton mekanizmat dhe jo hajde shkojmë të gazetari të na tregojë. Të gjitha këto janë shkelje. Janë në rrezik burimet konfidenciale të tyre pa të cilat nuk mund të ketë gazetari cilësore.”, tha Matlia.
