Kryetari i Partisë Mundësia, Agron Shehaj, ka kritikuar ashpër seancën parlamentare të sotme, duke e cilësuar atë si një teatër dhe një shfaqje që synon të ruajë pushtetin e mazhorancës dhe Partisë Demokratike (PD). Ai e përmendi kërkesën për shkarkimin e kryetarit të Kuvendit, Niko Peleshi, si një farsë, duke theksuar se do rritet bashkëpunimi mes palëve për të ndryshuar Kushtetutën.
Shehaj ka shprehur shqetësimin se PD ka tradhtuar votuesit opozitarë duke u bashkuar me Partinë Socialiste. Ai theksoi se kjo marrëveshje do të çonte në zhdukjen e partive të reja dhe mundësive alternative për qytetarët shqiptarë. “Marrëveshja e realizuar këtë javë tregon se mazhoranca dhe opozita kanë interes të përbashkët: të mbajnë pushtetin dhe të jenë alternativa e vetme”, tha ai.
Shehaj u shpreh se populli shqiptar po e sheh këtë si një tradhti të qartë. Ai theksoi se e gjithë betejat politike dhe retorika kundër Edi Ramës kanë rënë, pasi tani, sipas tij, këto dy grupe po bashkëpunojnë për të siguruar kontrollin mbi situatën politike. “Kjo është ajo që po ndodh në Shqipëri. Të gjithë e kuptojnë se ka një marrëveshje prapa skenave”, tha ai.
Deklarata e tij vjen pas ngjarjeve të fundit ku mazhoranca dhe opozita u treguan të bashkuar, duke krijuar një perceptim të një situate ku shpresat për një alternativë të re politike po zbehen. Shehaj e përfundoi duke e cilësuar seancën si një shfaqje, prej të cilës nuk do të përfitojnë qytetarët.
Në këtë kontekst, ai e theksoi nevojën për një reflektim nga ana e qytetarëve për të kuptuar realitetin e ri politik, i cili krijohet në baza të interesave të përbashkëta dhe jo për të mirën e shoqërisë.
