Ish-presidenti francez Nicolas Sarkozy ka kaluar natën e parë në burgun La Santé në Paris, ku ndodhet në izolim. Avokati i tij, Jean-Michel Darrois, e vlerësoi këtë përvojë si të vështirë, por të përballueshme. Ai përdori ironi duke thënë se burgimi nuk është aspak një resort luksoz, duke shtuar që Sarkozy ka bërë sport dhe ka filluar të shkruajë një libër në një qeli 9 metrash katrorë, e cila është shumë e zhurmshme.
Sarkozy kishte mundësi të takonte bashkëshorten e tij, këngëtaren Carla Bruni, gjatë takimeve javore të lejuara nga administrata e burgut. Avokati theksoi se dita e parë në burg është gjithmonë e vështirë, por Sarkozy e kaloi atë me qetësi.
Ish-presidenti mbërriti në burg me një makinë ‘Renault Espace’ në orën 09:37. Sidoqoftë, ai nuk është vendosur në sektorin e “të ndjeshmëve” për shkak të sigurisë, por në izolim të plotë për të shmangur kontaktin me të burgosurit e tjerë. Gjatë mbërritjes, ai u përball me thirrje të ashpra nga të burgosurit, të cilët e përshëndetën me komente si “Ja ku erdhi Sarkozy!”
Pas procedurave të zakonshme, atij iu morën shenjat e gishtave dhe iu dha një numër identifikimi. Ai dorëzoi dokumentet personale dhe sendet me vlerë, duke mbajtur vetëm unazën e martesës dhe orën e dorës. Në qelinë e tij, ai ka një tualet me dush, një shtrat, një tavolinë të vogël, një televizor dhe një telefon të fikur me 10 numra të miratuar nga administrata, të cilat mund t’i përgjojnë bisedat. Sipas raporteve, ai ka marrë produkte si sapun, çarçafë, dhe letër për të shkruar.
Sarkozy ndodhet pas hekurave për përfshirje në një grup të organizuar kriminal, lidhur me financimet e dyshuara libiane për fushatën e tij presidenciale të vitit 2007.
