Në ceremoninë e Samitit të katërt të Diasporës, e mbajtur në Pallatin e Kongreseve, Presidenti i Republikës, Bajram Begaj, dekoroi personalitete të shquara të Diasporës shqiptare për kontributet e tyre në fusha të ndryshme. Një nga të dekoruarit ishte ish-kapiteni i Kombëtares, Lorik Cana, i cili mori “Urdhrin e Skënderbeut”.
Gjatë fjalës së tij, Cana theksoi përpjekjet e tij për të ruajtur krenarinë dhe nderin e shqiptarëve përmes punës. Ai shprehu emocionet e tij për këtë nderim, duke theksuar se ndihma dhe mbështetja e familjes së tij, përfshirë gjyshërit dhe xhaxhain, kanë qenë frymëzim për të. Cana vlerësoi rëndësinë e momentit, duke e cilësuar si një ngjarje të veçantë që e lidh atë me shqiptarët e tjerë të suksesshëm.
