Në Kopenhagë, përfundon sot samiti i shtatë i Komunitetit Politik Evropian, ku marrin pjesë 45 liderë, përfshirë presidentin e Ukrainës, Volodymyr Zelensky dhe presidenten e Kosovës, Vjosa Osmani. Ky samit ka për qëllim të shqyrtojë mënyrat për forcimin e mbështetjes ndaj Ukrainës dhe situatën e sigurisë në Evropë, teksa BE-ja thekson rëndësinë e adresimit të kërcënimeve tradicionale dhe hibride, sigurisë ekonomike dhe migracionit.
Takimi do të udhëhiqet nga presidenti i Këshillit Evropian, Antonio Costa, dhe kryeministrja daneze, Mette Frederiksen. Sipas zyrtarëve të Kosovës, qëllimi i Komunitetit është të forcojë lidhjet politike dhe ekonomike në kontinent dhe të ofrojë zgjidhje për sfidat e përbashkëta.
Komuniteti, i krijuar në vitin 2022 nga presidenti francez Emmanuel Macron pas pushtimit rus të Ukrainës, funksionon si një forum ndërqeveritar për diskutime rreth të ardhmes së Evropës. Në takimin e parë në Pragë, Macron sqaroi se ky komunitet nuk është zëvendësim për anëtarësimin në BE, një pikë e rëndësishme për liderët e Ballkanit Perëndimor.
Vlen të theksohet se nga Ballkani Perëndimor, Kosova është e vetmja që nuk ka statusin e vendit kandidat për në BE, ndërsa Shqipëria dhe Mali i Zi kanë bërë përparim të konsiderueshëm në këtë drejtim. Tirana synon të bëhet anëtare e BE-së deri në vitin 2030.
Pjesëmarrësit në samit do të ndahen në tri grupe për diskutime të thelluara që përfshijnë kërcënimet tradicionale dhe të reja, sigurinë ekonomike dhe menaxhimin e flukseve migratore. Ky takimi pritet të zgjerojë bashkëpunimin midis vendeve të BE-së dhe atyre jashtë saj, me shpresën për zgjidhje efektive për sfidat aktuale të sigurisë në Evropë.
