Presidenti Donald Trump njoftoi të premten se Shtetet e Bashkuara do të presin samitin e ardhshëm të G20-ës në resortin e tij të golfit në Doral, Florida. Ai e cilësoi këtë vend si “më të mirin” për këtë ngjarje ndërkombëtare të nivelit të lartë, duke theksuar se “familja e tij nuk do të përfitojë nga ky ngjarje”.
Në mandatin e tij të parë, Trump kishte tentuar të organizonte një samit në të njëjtin resort, por e anulloi këtë plan pas kritikave për konflikt interesi. Ai shprehu dëshirën që liderë si Vladimir Putin dhe Xi Jinping të merrnin pjesë, duke thënë se do të ishte mirëpritur nëse ata do të donin të ishin të pranishëm.
Megjithëse djemtë e tij udhëheqin Trump Organization që nga kur ai mori detyrën si president, Trump nuk e ka fshehur dëshirën për të promovuar markën e tij në arenën globale. Ai ka promovuar monedhën e tij digjitale $TRUMP dhe ka organizuar ngjarje për investitorë, si një darkë luksoze për 220 investitorë në pronën e tij në Virxhinia. Gjithashtu, ai ka vizituar Skocinë për të inauguruar një fushë të re golfi dhe pati një vizitë të parë si president në Arabinë Saudite, vetëm pak kohë pas kërkesës së djemve të tij për investitorë në rajon për projekte kripto.
Samiti i G20-ës, që do të përfshijë ekonomitë kryesore botërore, planifikohet për dhjetor 2026. Trump theksoi rëndësinë e Doral për hapësirën dhe afërsinë me aeroportin e Miamit, duke thënë se “të gjithë e duan atje”. Sipas tij, çdo delegacion do të ketë një ndërtesë të tijën brenda resortit dhe ai e konsideron Doral si një nga pronat më të suksesshme në SHBA.
Kryetari i Bashkisë së Miamit, Francis Suarez, mbështeti njoftimin, duke thënë se ky është një impuls ekonomik për qytetin. Ai e lidh këtë vendim me mundësinë e Trump për të promovuar pronat e tij në fushën e mikpritjes. Në një zhvillim tjetër, Trump njoftoi se nuk do të marrë pjesë në samitin e këtij viti në Afrikën e Jugut, por do të përfaqësohet nga zëvendëse presidenti JD Vance. Kjo do të jetë hera e parë që Shtetet e Bashkuara organizojnë një samit të G20 që nga viti 2009.
