Ai që prek flamurin e PD i ka bërë hesapet shumë shumë keq. Do e shifni ditët e ardhshme. Nuk i preket flamuri Partisë Demokratike!”
Kështu është shprehur Sali Berisha mbrëmjen e sotme, teksa është pyetur për deklaratën e shpërndarë nga grupi i drjetuar nga Enkelejd Alibeaj më herët, se negociatat mes dy kampeve kishin dështuar. Kryetari aktual i PD, sapo shkoi në seli ku do të takohet me kryetarët e degëve të Tiranës.
“Opozita nuk mund të pengohet nga asgjë për të firmosur fitoren në këto zgjedhje. Zotërinjtë, një grup deputetësh, u ftuan, ose erdhën, pa asnjë lloj paragjykimi dhe prapamendimi që të bashkohen nëse donin, të garonin për çdo post në këto bashki, të paraqisnin kandidatura, ose në përputhje me statutin të krijonin, po të duan fraksionin.
Por ata, sa janë nuk e di, por ata nuk duan as statutin as primaret dhe as fraksionin. Të sigurt të jeni se ai që prek flamurin e PD-së, i ka bërë hesapet shumë, shumë keq. Kjo do të thotë që do e shikoni në ditët e ardhshme. Nuk i preket flamuri Partisë Demokratike”, u shpreh Berisha.
Më tej, ish-kryeministri foli dhe për protestën e 12 nëntorit dhe tregoi se mbrëmjen e sotme do të takohej pikërisht me kryetarët e degëve të Tiranës, për përgatitjen e saj.
“Sot unë kam një takim me kryetarët e degëve të PD-së së Tiranës, për të dhënë udhëzimet dhe për të bërë diskutimet për përgatitjet për protestën e jashtëzakonshme. Ju nuk mund ta imagjinoni se sa zien sot në të 4-anët e vendit urrejtja ndaj Edi Ramës dhe bandës së tij”, vijoi ai.
