Rusia ka sulmuar infrastrukturën energjetike të Ukrainës dhe Kievit këtë mëngjes, duke shkaktuar ndërprerje emergjente të energjisë elektrike në shumë rajone, përfshirë kryeqytetin. Kjo situatë erdhi vetëm dy ditë pas përfundimit të bisedimeve të paqes që u mbajtën në Miami, të ndërmjetësuara nga Shtetet e Bashkuara, ku morën pjesë zyrtarë amerikanë dhe delegacione ukrainase e evropiane.
Sipas Forcave Ajrore të Ukrainës, alarmin për sulme ajrore e shpallën në orën 08:20, ndërsa më pas është raportuar se mbeturina nga sulmet goditën një ndërtesë banimi në lagjen Sviatosinsky të Kievit, siç njoftoi kryebashkiaku Vitali Klitschko.
Ministria e Energjisë e Ukrainës konfirmoi ndërprerje të energjisë si pasojë e sulmeve ruse, duke e karakterizuar atë si një “sulm masiv me raketat dhe dronë”. Sipas kompanisë shtetërore Ukrenergo, puna për rikthimin e energjisë do të fillonte sapo të përmirësohej siguria në terren.
Gjatë një periudhe gati katërvjeçare të luftës, Rusia ka targetuar vazhdimisht rrjetin energjetik të Ukrainës, duke intensifikuar sulmet gjatë dimrit për të shkaktuar ndërprerje në energji dhe ngrohje, me qëllim tendosjen e situatës sociale dhe ekonomike në vendin fqinj.
Në përgjigje të këtyre sulmeve, Polonia, një anëtare e NATO-s që ndodhet në kufi me Ukrainën perëndimore, ngriti avionë luftarakë për të mbrojtur hapësirën ajrore të saj. Komanda Operacionale Polake shpalli se këto masa ishin të nevojshme për të siguruar dhe mbrojtur hapësirën ajrore polake pas sulmeve ruse që i shënjestruan zonat pranë kufirit.
Ky incident tregon se tensionet në regjion vazhdojnë të rriten, ndërsa bota ndiqet nga afër zhvillimet për të kuptuar implikimet për sigurinë dhe stabilitetin në Evropë.
