Analizë nga Timoni.al
Skandalet nuk kanë të sosur në Radio Televizionin Publik që mbahet me paratë e taksapaguesve. Para të vjedhura, emisione fiktive me biseda në studio e të kategorizuara si spektakle për efekt të rritjes së pagesave.
I vetmi drejtim ku RTSH konkurron mediat private është ai i parave, por me diferencë negative në profesionalizëm dhe cilësinë e emisioneve.
Nëse emisionet e pasdites në TvKlan, Top Channel, etj. financohen për pak lekë, i njëjti emision në RTSH arrin deri në 100 milionë lekë.
Konkretisht, “Brezballje”, emision me bisedë në studio me shfrytëzimin e nxënësve të shkollave me një moderator, do të xhelozonte edhe sipërmarrësit më të suksesshëm. Taksapaguesit shqiptarë paguajnë 3 milionë lekë për 60 minuta. Një total prej 12 milionë lekësh në muaj dhe 75 milionë lekë në gjashtëmujor. Si në rastet e tenderave, edhe në këtë emision janë përdorur emra fiktivë për të mbuluar përfituesit realë të parave. Kjo do të jetë edhe sfida e anëtarëve të Byrosë Kombëtare të Hetimit, për të ndjekur paratë.
Kjo është edhe dosja më e fundit e përgatitur dhe që pritet të depozitohet në SPAK.
Mes të tjerash, SPAK-ut po i vihet në dispozicion edhe një raport me shkeljet e tjera. Si në rastin e fondit prej 270 milionë lekësh që duhej përdorur për detyrimet e prapambetura, por që janë zhdukur nga Drejtoria Ekonomike.
Në SPAK është dërguar nga Komisioni i Medias edhe dosja me abuzimet e firmosura për projektet për ish-anëtarët e Këshillit të RTSH. Fenomen shqetësues në periudhën kur po zhvillohej gara e anuluar dhe drejtuesja kandidate Aurora Polo bleu me projekte numrat që i duheshin për t’u zgjedhur në krye të RTSH. 20 milionë lekë u paguan vetëm për natën e Vitit të Ri për atë që në RTSH përflitej si koncerti i “Papjonit të Tullumanit” dhe që lekët u fshehën nëpërmjet shoqatës jo fitimprurëse.
Abuzime të shumta u bënë edhe me fryrjen e numrit të punonjësve. Nga 940, në pak kohë ai shkoi në 1070 të tillë. Me qindra prej tyre nuk kanë shkelur ndonjëherë në ambientet e RTSH-së dhe vetëm marrin paga.
Mes drejtorive abuzive në këtë institucion, përfshihen ato të Burimeve Njerëzore, Drejtoria Ekonomike, Drejtoria Juridike, Drejtoria e Lajmeve, ajo Teknike, etj.
Abuzimet janë vijim i shkeljeve në pak vitet e fundit. Katër drejtorë, nga Thoma Gëllçi i dënuar për abuzim me tenderin 1 milion euro, Enkel Joti për të cilin KLSH ka kërkuar kthimin e 580 mijë eurove abuzime me tenderat.
Alfred Peza, drejtor i shkarkuar me dorëheqje për imoralitet dhe zhdukjen e 1.5 milionë eurove nëpërmjet projekteve dhe blerjeve pa fatura të mobiljeve të dërguara më pas në apartamentet private të tij.
Së fundmi edhe Aurora Polo, përmbyllin katërsheën e drejtuesve abuzivë që shkatërruan Televizionin e paguar me taksat e shqiptarëve.
RTSH ka një sfidë të vështirë, reformat duhet të jenë radikale.
