Të gjitha pjesët e pazëllit të sulmit vrasës të huliganëve kroatë që ndodhi mbrëmjen e së hënës jashtë “OPAP Arena” po tentojnë të bëhen bashkë nga policia greke.
Sipas informacioneve të deritanishme, huliganët dyshohet se kanë mbërritur në Greqi përmes Shqipërisë–pasi kanë kaluar nga Kroacia dhe Mali i Zi – dhe kanë vazhduar rrugën për në Athinë përmes rrugës Jonike.
Mediat greke thonë se 80 persona kanë hyrë nga dogana e Kakavisë dhe tetë automjete të tjera me numër të panjohur personash kanë hyrë nga Niki dhe Krystallopigi, Follorinë. Nga kontrollet e bëra rezulton se ata nuk kishin asnjë mjet të rrezikshëm me vete.
Madje, ata zgjodhën të shmangin kalimin përmes Serbisë, me frikën se mos bien në sy nga tifozët e ekipeve serbe, me të cilët marrëdhëniet janë armiqësore.
Siç bën me dije SKAI, autoritetet malazeze në orën 09:22 të mëngjesit të së hënës i kanë dërguar selisë së policisë greke një dokument dy faqesh duke i informuar se kishin kaluar kufirin dhe ishin nisur për në Athinë. Në fakt flitet për “tifozët e rrezikshëm”.
“Të nderuar kolegë më 7 gusht 2023 nga ora 03:00 e mesnatës deri në orën 06:00 të mëngjesit nga stacioni kufitar Bozai, në dalje për në Mal të Zi policët malazezë kontrolluan shtetas të Republikës së Kroacisë – rreth 120 të rinj – të cilët ne spekulojmë se po udhëtojnë drejt Greqisë për të parë ndeshjen e futbollit AEK – Dinamo Zagreb.
Ky grup është larguar nga Mali i Zi me mjetet e mëposhtme”, theksohet në informacionin e dhënë nga autoritetet malazeze.
