Autoriteti i Konkurrencës ka nisur një hetim paraprak ndaj ndërmarrjes SHPRESA – AL SHPK, e cila operon në tregun e transportit urban në Bashkinë Kamëz. Ky vendim erdhi pas ankesave të paraqitura nga qytetarët dhe shqetësimeve të shprehura në media lidhur me rritjen e çmimeve të biletave dhe aboneve për shërbimet e transportit urban.
Hetimi do të fokusohet në kushte konkurrence në treg, veçanërisht për linjat Kamëz – Tiranë – Kamëz dhe Paskuqan – Babrru – Tiranë. Sipas dokumenteve zyrtare, SHPRESA – AL SHPK është operatori i vetëm i licencuar për këto linja, duke mbajtur një pozitë dominuese në përputhje me Ligjin “Për mbrojtjen e konkurrencës”.
Nga analizat e bëra deri më tani, Autoriteti i Konkurrencës ka konstatuar se nuk ka informacione të plota që të justifikojnë rritjen e tarifave. Sipas vlerësimeve, rritja e çmimeve nuk është mbështetur në rritje reale të kostove dhe nuk ka prova që tregojnë se kjo është e nevojshme apo e justifikuar objektivisht.
Periudha e hetimit do të zgjasë nga 1 janar 2025 deri më 12 dhjetor 2025. Qëllimi është të vlerësohet nëse veprimet e SHPRESA – AL SHPK përbëjnë pengesa apo shtrembërime të konkurrencës sipas Ligjit nr. 9121/2003. Autoriteti do të vazhdojë me trajtimin e çështjes dhe do të njoftojë publikun mbi rezultatet e hetimit dhe çdo vendimmarrje të ardhshme.
