Bilanci i viktimave nga shembja e një landfilli në qytetin Cebu, Filipine, ka arritur në 11 persona, sipas autoriteteve. Ngjarja ndodhi javën e kaluar në landfillin Binaliw, ku më shumë se 100 punëtorë ishin në zonë në momentin e aksidentit.
Ekipet e shpëtimit kanë nxjerrë deri tani 12 persona të plagosur nga rrënojat, ndërsa mbi 20 të tjerë rezultojnë ende të zhdukur. Pavarësisht se shpresat për të gjetur të mbijetuar janë ulur pas tre ditësh nga rrëshqitja e dheut, autoritetet kanë raportuar “shenja jete” në zonën e aksidentit dhe operacioni i kërkim-shpëtimit vazhdon.
Ngjarja ka nxitur kërkesa për një hetim të plotë mbi shkaqet e shembjes dhe për një rishikim të sistemit të menaxhimit të mbetjeve. Autoritetet mjedisore kanë pezulluar aktivitetin e kompanisë Prime Integrated Waste Solutions, Inc., e cila menaxhon landfillin, dhe asaj i është kërkuar të paraqesë një plan për rregullim brenda 90 ditësh.
Nga ana tjetër, Departamenti i Mjedisit dhe Burimeve Natyrore ka njoftuar hapjen e një hetimi për të përcaktuar përgjegjësitë. Ligjvënësit po kërkojnë reforma të menjëhershme, duke theksuar se tragedi të tilla janë regjistruar edhe më parë. Një raport paraprak sugjeron se reshjet e vazhdueshme të shiut në javët e fundit, së bashku me faktorë inxhinierikë, mund të kenë kontribuar në rrëshqitjen e mbetjeve.
Landfillet janë të zakonshme në qytetet e mëdha të Filipineve, përfshirë Cebu-n, një qendër të rëndësishme tregtare dhe transporti në rajonin qendror të vendit. Tragjedia ka rikthyer vëmendjen ndaj kushteve të punës në këto objekte dhe ka nxitur kërkesa për reforma të menjëhershme për sigurimin e një mjedisi më të sigurt për punëtorët.
