BANGLADESH- Ka shkuar në 19 numri i personave që kanë vdekur dhe 164 i atyre që janë plagosur pasi një avion stërvitor i forcave ajrore të Bangladeshit u rrëzua në një kampus shkolle në kryeqytetin Daka. Pamjet nga Shkolla dhe Kolegji Milestone në periferinë veriore të Uttara tregojnë një zjarr të madh dhe tym të dendur, pasi avioni u përplas në një ndërtesë dykatëshe.
Forcat e armatosura thanë në një deklaratë në Facebook se avioni F-7 pësoi një defekt mekanik pasi u ngrit për një stërvitje menjëherë pas orës 13:00 sipas orës lokale (07:06 GMT). Piloti ishte midis të vrarëve, thuhej më tej në deklaratë. Më shumë se 50 persona, përfshirë fëmijë dhe të rritur, u dërguan në spital me djegie, tha një mjek në Institutin Kombëtar të Djegieve dhe Kirurgjisë Plastike.
Piloti, Togeri i Fluturimit Md. Taukir Islam, ishte përpjekur ta drejtonte avionin në një zonë më pak të populluar pasi ndodhi defekti mekanik, thuhet në deklaratën e forcave të armatosura. Ai sapo ishte ngritur nga një bazë e forcave ajrore në kryeqytet.
Të plagosurit janë transferuar në spitalet aty pranë, ndërsa ekipet e emergjencës po vazhdojnë operacionet e shpëtimit në vendngjarje. Një komision hetimor është formuar për të hetuar incidentin, shtoi deklarata. Imazhet nga vendi i ngjarjes tregojnë dhjetëra punonjës të shërbimit të emergjencës që kërkojnë nëpër rrënojat e djegura për të gjetur të mbijetuar, ndërsa vëzhgohen nga turma të mëdha kalimtarësh që ngjiten në majë të ndërtesave përreth për të parë.
Muhammad Yunus, udhëheqësi i qeverisë së përkohshme të Bangladeshit, tha se do të merren masat e nevojshme për të hetuar shkakun e incidentit dhe për të siguruar të gjitha llojet e ndihmës.
“Ky është një moment pikëllimi të thellë për kombin. U uroj të plagosurve shërim të shpejtë dhe u jap udhëzime të gjitha autoriteteve, përfshirë spitalet përkatëse, që ta trajtojnë situatën me rëndësi të madhe”, tha ai në një postim në X. Bangladeshi ka shpallur ditë zie të martën, kur flamuri kombëtar do të ulet në gjysmështizë në të gjithë vendin.
