Katër grupe komisionesh verifikimi kanë vizituar fshatin Ferras për të vlerësuar dëmet nga përmbytjet e fundit. Procesi i verifikimit po zhvillohet si brenda ashtu edhe jashtë argjinaturës, duke evidentuar prezencën e ujit dhe pasojat e tij në banesa. Sipas të dhënave të para, janë identifikuar rreth 120 banesa të prekura, me dëme që përfshijnë ambiente të brendshme, oborre, magazina, pajisje bujqësore dhe infrastrukturë ndihmëse. Uji ka depërtuar rëndë në disa shtëpi, duke shkaktuar dëme të dukshme.
Komisionet kanë filluar punën në zonat më problematike brenda argjinaturës, ku uji ka qëndruar për disa orë. Pas kësaj, do të vazhdojnë verifikimet në banesat e prekurat nga vërshimi mbi kanalin e Martines, i cili ka çuar në shtrirjen e ujit në zona të tjera banimi. Çdo rast po dokumentohet me procesverbale, fotografi dhe të dhëna të detajuara, të cilat do t’i ndihmojnë institucioneve për hartimin e një raporti përfundimtar dhe vlerësimin e masave të nevojshme për ndihmë dhe dëmshpërblim.
Autoritetet lokale kanë njoftuar se procesi i verifikimit do të vazhdojë edhe në ditët në vijim dhe iu bëjnë thirrje banorëve të bashkëpunojnë me komisionet për të raportuar çdo dëm nga përmbytjet. Situata në zonë është nën monitorim të vazhdueshëm, me struktura emergjencash të gatshme për veprim.
