Një masiv mali është shkëputur përgjatë rreth 500 metrave rrugë tokësore në fshatrat Bashaj dhe Matogjin, duke lënë dhjetëra familje të izoluara dhe në kushte të vështira. Banorët e fshatit Bashaj përballen me mungesë ushqimi dhe ujë të pijshëm, pasi dëmtimi i tubacionit të ujit, që ndodhi pesë ditë më parë, ka lënë fshatin pa furnizim me ujë.
Forcat xheniere të Ushtrisë, të shoqëruara nga prefektja e Qarkut Vlorë, znj. Evis Alushi, kanë mbërritur në zonë për të inspektuar situatën. Tani po kryhen matje për ndërtimin e një rruge alternative, pasi zona ka një histori të kaluar me rrëshqitje masivësh, të cilat kanë ndodhur edhe në vitet e mëparshme, duke izoluar shpesh fshatrat Bashaj dhe Matojan.
Banorët e Bashaj kërkojnë ndërhyrje urgjente për hapjen e rrugës së dëmtuar dhe për furnizim me ujë dhe ushqim. Ajo çfarë i shqetëson ata është situata e rënduar e jetesës, që po zgjat të paktën pesë ditë, me një segment rrugor të prekshëm prej rreth 500 metrash.
