Qeveria shqiptare ka depozituar një projektligj të ri, “Për tregjet e kripto-aseteve”, që ka si qëllim rregullimin e për herë të parë të bursave, platformave dhe ofruesve të shërbimeve të aseteve virtuale. Ky draft vjen si reagim ndaj rritjes së përdorimit të kriptomonedhave në vend dhe nevojës për të vendosur rregulla që mbron investitorët dhe siguron transparencën.
Ministria e Ekonomisë dhe Inovacionit thekson se projektligji synon të rregullojë të gjitha subjektet dhe veprimtaritë që lidhen me emetimin e kripto-aseteve dhe tokenave të parasë elektronike, si dhe veprimtaritë e ndërmjetësimit, përfshirë operimin e platformave tregtare dhe shërbimeve të kujdestarisë. Drafti parashikon licencimin e detyrueshëm për platformat që ofrojnë tregtim dhe shërbime me kripto-asete, si dhe vendosjen e kërkesave për kapital minimal, transparencë dhe mbikëqyrje më të fortë mbi aktivitetet që deri tani janë zhvilluar në një “zonë gri”.
Autoriteti i Mbikëqyrjes Financiare do të jetë institucioni përgjegjës për dhënien e licencave dhe kontrollin e tregut. Subjektet e licencuara do të kenë detyrimin të raportojnë rregullisht mbi aktivitetet e tyre dhe të zbatojnë standardet për parandalimin e pastrimit të parave.
Ministria gjithashtu thekson që projektligji ka për qëllim garantimin e standardeve të larta për mbrojtjen e investitorëve dhe integritetin e tregut, përmes kërkesave prudenciale, politikave të qeverisjes korporative, masave të sigurisë kibernetike, dhe mekanizmave për parandalimin e manipulimit të tregut.
Me miratimin e këtij projektligji, pritet të formalizohet tregu i kripto-aseteve në Shqipëri, duke garantuar një mbikëqyrje më të fortë dhe një treg më të qëndrueshëm, në përputhje me zhvillimet e tregjeve europiane.
