Parlamenti Europian ka miratuar ndryshime të rëndësishme në sistemin e përbashkët të azilit, përfshirë krijimin e një liste unike të Bashkimit Europian për vendet e origjinës që konsiderohen të sigurta. Në këtë listë janë përfshirë vende si Kosova, Bangladeshi, Kolumbia, Egjipti, India, Maroku dhe Tunizia.
Regullat e reja parashikojnë që këto shtete do të trajtohen si vende të sigurta për qytetarët që kërkojnë azil në BE. Kjo do të thotë se ekziston një prezumim sigurie, duke supozuar se azilkërkuesi nuk ka nevojë për mbrojtje ndërkombëtare. Në situata të tilla, kërkesat për azil do të kalojnë në procedura të përshpejtuara, ku ato shpesh refuzohen si “qartazi të pabaza”.
Një aspekt tjetër është se barra e provës i kalon te azilkërkuesi, i cili duhet të dëshmojë se, pavarësisht klasifikimit të vendit të origjinës, ekziston një frikë e bazuar për persekutim ose rrezik serioz nëse kthehet në atdhe. Po ashtu, vendet kandidate për anëtarësim në BE do të konsiderohen, në parim, si vende të sigurta origjine, përveç rasteve kur kanë rrethana specifike që tregojnë të kundërtën.
Ndryshimet e miratuara pritet të hyjnë në fuqi pas miratimit përfundimtar nga Këshilli i BE-së dhe të zbatohen nga qershori i vitit 2026. Këto reforma janë pjesë e një përpjekjeje më të gjerë për të modernizuar politikat europiane lidhur me emigracionin dhe azilin.
