Kryetari i Komisionit të Punëve të Jashtme të Bundestagut gjerman, Michael Roth, tha se për shumë evropianë dhe miq të përkushtuar të Ballkanit Perëndimor, presidenti serb Aleksandar Vuçiç dhe regjimi i tij nuk janë më një partner i besueshëm.
Në një intervistë për gazetën Nova, Roth tha se nuk ka vend në Bashkimin Evropian (BE) për shërbëtorët e presidentit rus Vladimir Putin.
Ai tha se BE-ja nuk e ka më luksin të mos ndërhyjë në punët e brendshme të një vendi. “Ne nuk duhet të jemi indiferentë nëse parimet themelore të demokracisë dhe shtetit të së drejtës bien nën presion në një nga vendet tona partnere. Madje ekziston një detyrim për të ndërhyrë”, tha Roth.
Michael Roth tha se pritshmëritë e tij janë që autoritetet kompetente dhe gjykatat (në Serbi) të sqarojnë gjithçka që lidhet me këto akuza (për zgjedhjet) dhe nëse është e nevojshme, të hapin rrugën për përsëritjen e zgjedhjeve.
Roth ka hedhur akuza për zgjedhjet në Serbi, duke thënë se në to kishte edhe votues fantazmë.
