Sot u hap zyrtarisht gara për kryetarin e ri të PD-së. Përballë Lulzim Bashës që kërkon rikthimin në krye të PD-së është Gjergj Hani. Gara për shumë individë është e mbyllur pa u nisur. Por çfarë mendon rivali i Bashës?“5Pyetjet.al” kontaktoi me zotin Hani për të pyetur për strategjinë, projektin politik dhe përballjen me Bashën. Idetë i kishte të qarta.
“PD duhet të reformohet thellë. Ky është një hap i parë që e marr në emër të së vërtetës. Do të merrem me rimëkëmbjen e PD-së nga boshti ideologjik, rindërtimi i statutit, bazë e gjerë riorganizimi. Do të tërheq grupe të mëdha interesi. Nuk do të jetë parti e mbyllur e një personi. Duhet të shëndosh shtëpinë politike. Unë garën nuk e shikoj si luftë, si hasmë, që gërryen ndjenjat. Këtu bëhet fjalë për të stabilizuar disa të vërteta” tha ai.
Për Sali Berishën në PD-në e tij nëse fiton nuk ka vend, por për Bashën ka një kusht. “Për Berishën absolutisht nuk ka vend në PD. Nuk ka çfarë jep përveç dëmeve që ka shkaktuar që nga 1993 duke zhdoganuar krimet e komunizmit. Për Bashën ka vend, por në fillim duhet të bëjë një reflektim të thellë.
Unë nuk jam për amnistinë e askujt. Por nëse do të dëshironte të rikthehej në gjirin e PD-së duhet të ketë përulësinë t’u thotë të vërtetën demokratëve cili ka qenë roli i tij në raport me Berishën, kur ka qenë kryetar dhe jo vetëm. Ai të thotë, të tregojë sa vendoste Berisha dhe sa vendoste ai në kohën që drejtonte PD-në. Nëse pretendon se do të sjellë ndryshimin, duhet të na thotë si, dhe të jap shpjegime si ka ndodhur.
Sot flet për lista të hapura, por ka qenë kryetar i PD-së dhe nuk e ka përmendur asnjëherë. Kur e zbuloi se ishte akt i padrejtë për lirinë e përfaqësimit? Prandaj nuk e shoh të besueshëm. Mund të jetë një arnë duke stigmatizuar Berishën, si të keqen e tij, që për mua nuk është plotësisht. Është fryma, nepotizmi, por edhe probleme të tjera. Basha të vijë me kokën ulur dhe të shpjegojë shumë arsye. Ai ka qenë në kulisat e PD-së ku merreshin shumë vendime pa pyetur anëtarësinë” tha ai për “5Pyetjet.al”.
Po a ka moral politik Basha për të rikandiduar pas të gjitha humbjeve në krye të PD-së? “Nëse nuk arrin që të japë shpjegimet për gjithçka ka ndodhur, natyrisht që nuk ka moral. Nëse mendon se ka moral, ta vendosin demokratët. Por duhet një zë alternativ të vendoset përballë të vërtetave. Nëse nuk del të sqarosh, që “kam gabuar se nuk kisha kurajo”, “vendoste Berisha”, etj, pastaj demokratët të vendosin nëse ke moral për t’u rikthyer. Duhet të sqarojë qeverisjen me zotin Berisha dhe kohën në krye të PD-së” tha ai.
A e takuar zotin Basha? “Po, e kam takuar dy -tre herë, por nuk bëhet as gjysmë ore po të mbledhësh të gjitha takimet” tha ai. Çfarë përgjigje ka ai për ata që e krahasojnë me Maqo Lakrorin në këtë garë? “Nëse do të ndalosh që të gjuash me gur çdo qen që del rrugës nuk do të mbërrish kurrë në destinacion” tha ai.
Ku e shihni PD-në në 2025-sën me Bashën në krye, a i çon demokratët në fitore? Nëse vazhdon me demagogji populiste, me vettingun e politikanëve apo listat e hapura… vettingu i politikanëve të bëhet përmes magjistraturës. Cdo politikan është i detyruar që të bëjë deklarimin e pasurisë. Se çfarë ndodh në 2025 e kam thënë që 8 vite më parë” tha ai.
Nëse fiton garën, Hani thotë se është gati t’i propozojë Bashës postin e sekretarit të marrëdhënieve me jashtë në partinë kryesore të opozitës. “Gjithmonë nëse do të jetë në krah të së vërtetës.
PD-ja që kam unë në mendje është kjo, që është sekretari i përgjithshëm për çështjet organizative, propozimet i bën ai, jo kryetari. Do të ndërtohet një parti e balancuar. Mos ketë mundësi të kthehet kulti i individit. Posti për Bashën? Padyshim, mund të ishin marrëdhëniet me jashtë duke pasuar parasysh njohjet që ka ndërtuar në këto vite. Kjo është një mundësi pse jo” përfundoi ai intervistën.
