Sot në orën 11:00, Silvinjo do të dalë për para gazetarëve për t’u pyetur në lidhje me listën që do të publikojë 1 apo 2 orë përpara konferencës për shtyp, e gjitha kjo në kuadër të dy ndeshjeve që Kombëtarja do të luajë më 11 dhe 14 tetor, përkatësisht me Çekinë dhe Gjeorgjinë, të dyja në transfertë.
Braziliani i stolit ka treguar se di si të befasojë me emrat, qoftë duke lënë jashtë një lojtar të njohur që do të bëjë bujë në opinionin sportiv, apo qoftë kur thirret dikush për herë të parë, edhe pse nuk është një emër i pritshëm.
RIKTHIMET- Ernest Muçi dhe Mirlind Daku pritet të jenë hyrjet në këtë grumbullim. Të dy lojtarët munguan në muajin shtator. Fantazisti nuk u përfshi nga Silvinjo për zgjedhje teknike, ndërsa Daku ndeshjen e parë ishte i pezulluar nga UEFA, por gjithashtu kishte edhe një shqetësim të lehtë. Kështu, të dy lojtarët do të jenë në listën e trajnerit për këto dy ndeshje. Me Gjimshitin, i cili po punon i veçuar, Silvinjo mund të rikthejë Arlind Ajetin, i cili kaloi dëmtimin dhe po luan në Superligën turke.
Në këtë pozicion pritet të sakrifikohet i riu Ardian Bajrami, pasi Kumbulla, Ismajli dhe Mihaj janë në formë shumë të mirë. Nga krahët Hysaj, Balliu dhe Mitaj. Në mesfushë i vetmi që nuk ia del është Medon Berisha, ndërkohë një risi mund të jetë edhe Adrion Pajaziti, ndërsa pjesa tjetër mbetet e pandryshuar nga muaji i kaluar.
Sakaq, për të kaluar te sulmi, në dilemë është Rei Manaj, i cili parapëlqehet si titullar nga Silvinjo. Me një sy nga Rei, duke pritur nëse do të jetë i rikuperuar 100%, trajneri mund të befasojë duke thirrur Indrit Tucin, një sulmues i fortë që luan te Sparta e Pragës. Po ashtu pritet të shihet nëse Zeka dhe Spahiu do të gjejnë vend këtë radhë.
