Avokati i Përgjithshëm i Gjykatës së Drejtësisë së Bashkimit Evropian, Dean Spielmann, ka rikthyer në vëmendje çështjen e pezullimeve dyvjeçare ndaj ish-drejtuesve të Juventusit, Andrea Agnellit dhe Maurizio Arrivabenes, një skandal që preku thellë ekuilibrin mes autonomisë sportive dhe mbrojtjes së të drejtave themelore të garantuara nga BE-ja.
Në analizën e tij, Spielmann shqyrton përputhshmërinë e sanksioneve sportive me ligjet evropiane mbi lëvizjen e lirë dhe konkurrencën. Ai konstaton se një ndalim dyvjeçar për të ushtruar aktivitet në futbollin profesionist nuk është automatikisht në kundërshtim me të drejtën e Bashkimit Evropian, nëse kjo masë justifikohet për të ruajtur integritetin e garave. Megjithatë, legjitimiteti i këtyre sanksioneve varet nga respektimi i kritereve të qarta, objektive dhe jodiskriminuese, si dhe nga transparenca dhe drejtësia e procesit disiplinor.
Një pikë shqetësuese e mendimit të Spielmann lidhur me sistemin italian të drejtësisë sportive është kufizimi i ndërhyrjes së gjykatave administrative, të cilave u lejohet vetëm të japin dëmshpërblime financiare dhe jo të pezullojnë sanksionet disiplinore. Ky kufizim, sipas tij, është në kundërshtim me ligjin evropian dhe cënon të drejtën për mbrojtje gjyqësore efektive.
Për më tepër, Spielmann thekson se autonomia e sportit nuk mund të jetë superiore ndaj të drejtave themelore, si e drejta për punësim. Nëse një sanksion është i paligjshëm, një gjyqtar kombëtar duhet të ketë aftësinë për ta anuluar atë.
Edhe pse mendimi i Avokatit të Përgjithshëm nuk është detyrues, Gjykata e Drejtësisë së BE-së shpesh ndjek këto orientime në vendimet e saj përfundimtare. Vendimi për këtë çështje pritet brenda tre deri në gjashtë muajsh. Nëse Gjykata konfirmon këtë qasje, mund të sjellë pasoja të thella për sistemin e drejtësisë sportive në Itali, ofrën Agnellit dhe Arrivabenes një mjet të fuqishëm për të sfiduar sanksionet dhe potencialisht duke detyruar rishikimin e marrëdhënies mes gjykatave sportive dhe atyre shtetërore.
