Një sërë dokumentesh të reja lidhur me çështjen Epstein ka nxjerrë në dritë një komunikim privat mes ish-gazetarit amerikan Landon Thomas Jr dhe financierit Jeffrey Epstein. Në një email të dërguar në janar 2015, Thomas Jr sugjeronte se Princi Andrew kishte pasur marrëdhënie konsensuale me një punonjëse të Epstein. Ai theksonte se lidhja e Andrew me Epstein ishte arsyeja pse akuzat ndaj tij vazhdonin të riktheheshin, duke e inkurajuar Epstein të distancohej nga ish-anëtari i familjes mbretërore britanike.
Princi Andrew ka mohuar gjithmonë çdo dijeni apo përfshirje në krimet seksuale të Epstein, pavarësisht miqësisë së ngushtë mes tyre. Thomas Jr, i cili shihej si i afërt me Epstein, deklaroi për The Telegraph se komentet e tij në email ishin thjesht pasqyrë e raportimeve të medias nga ajo kohë, pa pasur informacione të drejtpërdrejta nga Epstein.
Kjo publikim erdhi pas një emaili tjetër nga Ghislaine Maxwell, e dënuar për trafikim seksual, ku ishte përmendur një “masazh” që Andrew kishte marrë në shtëpinë e saj në Belgravia. Emri i Andrew është i lidhur ngushtë me çështjen, sidomos pas akuzave nga Virginia Giuffre, e cila ka pretenduar se kishte marrëdhënie me të në moshën 17-vjeçare.
Me rritjen e presionit publik, Mbreti Charles i hoqi Andrew të gjitha titujt mbretërorë muajin e kaluar. Po ashtu, anëtarë të Kongresit amerikan i kanë dërguar një thirrje zyrtare Andrew për të dëshmuar mbi “miqësinë e tij afatgjatë” me Epstein, megjithëse ai nuk ka detyrim ligjor përparaqitje.
Kjo valë e re zbulimesh vjen në prag të publikimit të një sasie të madhe dokumentesh të tjera mbi çështjen Epstein, të cilat pritet të deklasifikohen brenda 30 ditëve. Miratimi nga Senati dhe Dhoma e Përfaqësuesve është dhënë, ndërsa dosjet presin firmën e Presidentit Donald Trump për t’u bërë publike.
