UEFA dhe Superliga po shkojnë drejt një marrëveshjeje historike për një format të ri të Champions League, që do të hyjë në fuqi pas vitit 2027, kur skadojnë të drejtat aktuale televizive. Superliga, e cila u shpall nga 12 klube të mëdha në prill 2021, u anulua menjëherë pas kritikave të shumta, duke mbetur vetëm Real Madrid si mbështetës.
Sipas gazetës, Arancha Rodríguez, plani i ri përfshin ruajtjen e fazës së ligës dhe të eliminimit direkt, por me disa ndryshime të rëndësishme. 36 skuadrat pjesëmarrëse do të ndahen në dy grupe prej 18 ekipesh. Grupi i parë do të përfshijë skuadrat më të mira sipas renditjes së UEFA-s, ndërsa grupi i dytë do të përfshijë ekipet e tjera. Secila skuadër do të luajë tetë ndeshje vetëm kundër rivalëve brenda grupit të saj.
Kualifikimi do të mbetet i lidhur me performancën në kampionatet vendase dhe koeficientin e ligave. Tetë skuadrat më të mira nga grupi elitar do të kalojnë direkt në fazën e eliminimit, ndërsa mënyra e mbetur e kualifikimit është ende në diskutim.
Ndryshimi më i rëndësishëm pritet të ndodhë jashtë fushës së lojës. UEFA planifikon të krijojë një platformë transmetimi të saj nën një model “Netflix-style”, duke shmangur shitjen e të drejtave televizive te rrjetet tradicionale. Kjo do ta bënte turneun më të përballueshëm për tifozët, madje edhe falas për disa ndeshje, me të ardhura që do të vinin nga reklamat.
Nëse këto plane realizohen, Champions League do të ruajë emrin e saj historik, por në praktikë do të kthehet në një turne të ri që përfshin elementët e formatit aktual dhe konceptin e Superligës. Kjo marrëveshje e mundshme synon të transformojë dinamikat e garës dhe ta bëjë atë më pak të varur nga modelet tradicionale të transmetimit, duke ofruar edhe një eksperiencë më të afrueshme për tifozët.
