Gjiganti i tregtisë elektronike Amazon po planifikon një revolucion në mënyrën e funksionimit të saj në Shtetet e Bashkuara. Sipas dokumenteve të siguruara nga The New York Times, kompania e themeluar nga Jeff Bezos ka për qëllim që të automatizojë operacionet e saj dhe të zëvendësojë mbi 500,000 punonjës me robotë në dekadën e ardhshme.
Drejtorët e Amazon-it e shohin këtë transformim si një “ndryshim historik”, që do t’i ndihmojë të ulën kostot e punës dhe të rrisin efikasitetin në qendrat logjistike. Sipas planit, deri në 75% e impianteve mund të bëhen plotësisht të automatizuara, duke përjashtuar mundësinë e punësimit të rreth 160,000 punonjësve të rinj deri në vitin 2027. Ky proces pritet të sjellë një kursim prej 12.6 miliardë dollarësh për kompaninë nga vitet 2025 deri në 2027, me koston për çdo produkt të magazinuar apo dërguar duke rënë në mesatarisht 30 cent.
Dokumentet sugjerojnë që menaxherët e Amazon-it duhet të shmangin terminologjinë “automatikë” apo “inteligjencë artificiale”, duke preferuar nocione si “teknologji e avancuar” ose “cobot”, që përshkruan bashkëpunimin mes robotëve dhe njerëzve. Megjithatë, pas publikimit të këtyre informacioneve, Amazon u detyrua të reagojë. Zëdhënësja e kompanisë, Kelly Nantel, theksoi se dokumentet ishin “të pjesshme dhe jo përfaqësuese” të strategjisë së plotë të punësimit.
Ajo sqaroi gjithashtu se kompania planifikon të punësojë 250,000 persona për festat e fundit të vitit, pa dhënë detaje mbi sa prej tyre do të kenë kontrata afatgjata. Kritikët e kësaj lëvizjeje e shohin si një tregues të qartë se automatizimi po avancon me shpejtësi, me pasojat që pritet të riformatojnë tregun e punës global. Mijëra vende pune do të zëvendësohen nga makineritë, që mund të sjellë ndryshime të rëndësishme në mënyrën si funksionon ekonomia moderne.
