Reshjet e dendura të shiut kanë shkaktuar vështirësi në qarkullimin e mjeteve në disa zona të vendit, përfshirë rrugën interurbane Tiranë–Durrës. Në hyrje të Durrësit, afër një karburanti, uji ka mbuluar të dy anët e rrugës, duke e bërë lëvizjen e automjeteve të vështirë dhe të pamundur në disa momente.
Për të evitura ndonjë trafik apo aksidente, Policia Rrugore ka marrë masa për të devijuar lëvizjen e automjeteve. Automjetet që lëvizin nga jugu drejt Tiranës janë të detyruara të përdorin Rrugën e Plepave, duke kaluar përmes Ndroqit dhe pastaj në rrugën “Rrogozhinë–Elbasan–Tiranë”. Në drejtim të Durrësit, automjetet duhet të kalojnë nga rruga e universitetit në Spitallë dhe më pas në “Tiranë–Elbasan–Rrogozhinë”.
Policia apelon tek drejtuesit e mjeteve që të shmangin lëvizjet e panevojshme dhe të tregojnë kujdes maksimal gjatë qarkullimit. Ajo i inkurajon ata të ndjekin udhëzimet e punonjësve të Policisë dhe të respektojnë sinjalistikën rrugore. Shërbimet e Policisë Rrugore, së bashku me Patrullat e Përgjithshme, janë angazhuar për të lehtësuar qarkullimin dhe për të ofruar ndihmën e nevojshme për drejtuesit në vështirësi.
Situata në rrugë, si pasojë e kushteve atmosferike, mbetet e ndjeshme, dhe autoritetet i japin prioritet sigurisë në qarkullim. Lexuesit dhe drejtuesit e mjeteve inkurajohen të jenë vigjilentë dhe të bashkëpunojnë me autoritetet për të garantuar një qarkullim të sigurt.
