Detaje të reja janë zbardhur mbi ngjarjen e rëndë që tronditi këtë të mërkurë veriun e vendit, ku trupi i pajetë i 23-vjeçarit Renis Dobra u gjet pranë liqenit të Shkopetit.
Sipas raportimeve dyshohet se i riu është ndjekur nga një makinë tjetër që nga Burreli deri në zonën e Ulëzës, ku mendohet se ka ndodhur rrëmbimi dhe më pas vrasja.
Grupi hetimor ka sekuestruar pamje filmike nga disa kamera sigurie në qytetin e Burrelit, ndërsa në pjesën tjetër të rrugës mungojnë regjistrimet, çka vështirëson ndjekjen e itinerarit të autorëve.
Mbi trupin e viktimës janë konstatuar shenja të dukshme dhune, përfshirë mavijosje në zonën e fytit. Dyshohet se Dobra është mbytur fillimisht me litar dhe më pas është hedhur në liqen bashkë me automjetin, për të fshehur gjurmët e krimit. Shkaku i saktë i vdekjes pritet të përcaktohet nga ekspertiza mjeko-ligjore.
Hetimet janë përqendruar në dy pista kryesore: një konflikt për shkak të parcelave me kanabis, dhe një përplasje për motive xhelozie apo lidhje sentimentale. Dobra nuk rezulton me precedentë të rëndë penalë, përveç disa rasteve të vjedhjes.
