Kontrolle të shumta në Vlorë dhe zonat përreth. Kanë kaluar tre ditë nga vrasja e bujshme në Vlorë, por ende nuk ka asnjë të arrestuar. Mister mbeten motivet e atentatit mafioz, ku 23-vjeçari Gëzim Sinomati u ekzekutua me snajper teksa po konsumonte një cigare në ballkonin e banesës.
Pistat lidhen me të shkuarën kriminale të Sokol Sinomatit, babait të viktimës dhe aktivitetin e tij të pas viteve 97-të. Por autoritet nuk përjashtojnë as vrasjen me motive të konflikteve të kohëve të fundit në Belgjikë, për një sasi të vjedhur të kokainës, ku rezultojnë të vrarë dy persona gjatë muajve të fundit.
Hetim ka nisur edhe ndaj punonjësve të OSHEE për të mësuar motivet e ndërprerjes së energjisë elektrike në momentin që ndodhi atentati. Nuk përjashtohet që objektiv i atentatit mund të ketë qenë edhe xhaxhai i tij, Bernard Sinomati, i cili kishte rreth një vit që jetonte në Vlorë. Bernard Sinomati i shpëtoi një atentati me tritol më 3 janar të vitit 2022.
