Shfaqja “Rendi i ri”, e dramaturgut spanjoll Sergi Pompermayer, ka shënuar hapjen e sezonit të ri teatror në Gjirokastër. E interpretuar nga aktorët e teatrit shëtitës “Çajupi”, pjesa trajton probleme aktuale të shoqërisë bashkëkohore.
Ngjarja zhvillohet në një repart autopsie të braktisur, duke pasur në qendër katër rrëmbyes dhe dy të rrëmbyera, një nënë dhe bijë. Ky grup, i kapur nga urrejtja dhe grindjet për vendin, përballen me pasiguri, krizë demokracie, vënie në pikëpyetje të drejtësisë dhe abuzim emocional, tema këto që reflektojnë kompleksitetin e pakënaqësisë dhe anarkisë.
Aktoreja Era Çaushi shprehu se shfaqja është shumë aktuale për popullin që përjeton probleme si papunësia dhe legalizimi i pronave. “Ishte shumë afër nesh,” theksoi ajo. Aleksandër Kondi, një nga aktorët e pjesës, vlerësoi punën e ekipit, duke theksuar se çdo aktor duhet të lë një copë të shpirtit në këto role, për shkak të përjetimeve emocionale të vështira. Ai shprehu gjithashtu kënaqësinë e tij që premiera u mbajt në Gjirokastër.
Regjisori Kiço Londo vuri në dukje se teatri shëtitës ka një lidhje të fortë me Gjirokastrën dhe se fillimi i kësaj shfaqjeje dramatike në këtë qytet simbolizon një shpresë për udhëtimin e saj të ardhshëm.
Gjatë sezonit artistik të vjeshtës në skenën e teatrit “Zihni Sako”, janë parashikuar trupa vendase dhe të huaja, që do të kontribuojnë në pasurimin e jetës artistike në Gjirokastër. Kështu, qyteti do të jetë një qendër aktive për artin skenik, duke ofruar mundësi për shfaqje dhe projekte të reja për artdashësit.
