Deputeti i Partisë Demokratike, Luçiano Boçi, ka komentuar reformën e re territoriale, duke theksuar se kjo reformë nuk përfaqëson një hap të ri, por është një vazhdimësi e reformës së dështuar të vitit 2014. Në një intervistë për ‘Top Story’, Boçi ka shfaqur shqetësimin e tij se për të njëjtit individë, strategji dhe fjalor po punohet edhe këtë herë. Ai ka theksuar nevojën për t’i dhënë pushtet real pushtetit lokal, duke e konsideruar si të domosdoshme rritjen e numrit të bashkive.
Boçi vuri në dukje funksionin e komisionit që po punon për këtë reformë dhe theksoi rëndësinë e komunikimit me publikun dhe të kryetarëve të bashkive. Ai kërkoi takime me banorët për të siguruar një proces konsultativ të hapur dhe transparent, duke e shikuar opozitën si një force aktive që duhet të angazhohet në dialogun publik.
Sipas tij, nuk mund të pritet që një draft të gatuhet si “magji” pa një përfshirje të mirëfilltë të qytetarëve. Boçi theksoi se kjo reformë nuk është një mundësi e re, por vazhdim i një filozofie që ka dështuar më parë, e cila ka si objektiv decentralizimin e pushtetit lokal. Ai argumentoi se marrëdhëniet mes pushtetit lokal dhe atij qendror janë të rëndësishme, por shiheshin si një mekanizëm që funksiononte për të siguruar votat e pushtetit qendror.
Boçi theksoi se problemi kryesor qëndron në mënyrën se si pushteti lokal është i varur nga privilegjet e qendrës. Ai kërkoi një reformë të vërtetë që do t’i jepte pushtetit lokal pushtet real, dhe e shihte rritjen e numrit të bashkive si një hap të domosdoshëm për të arritur rezultate të ndryshme në menaxhimin lokal. Në përfundim, ai e cilësoi bashkinë si një shërbim në vend të një ndërmarrjeje financiare, duke theksuar rëndësinë e qeverisjes efikase për qytetarët.
