Real Madridi ka publikuar një raport zyrtar mjekësor për Trent Alexander-Arnold, i cili pësoi një dëmtim gjatë ndeshjes ndaj Athletic Bilbaos në “San Mamés”. Sipas njoftimit të klubit, pas testeve të kryera nga Shërbimet Mjekësore, Alexander-Arnold është diagnostikuar me një dëmtim muskulor në rectus femoris të kuadricepsit të këmbës së majtë, dhe rimëkëmbja e tij do të monitorohet.
Sipas burimeve nga MARCA, mbrojtësi britanik pritet të mungojë për të paktën dy muaj, duke humbur rreth dhjetë ndeshje në të gjitha kompeticionet. Ai do të jetë jashtë për ndeshjet e Champions League kundër Manchester Cityt, Monacos dhe Benficës, si dhe për gjysmëfinalen e Superkupës së Spanjës ndaj Atlético Madridit, përfshirë një finale të mundshme. Mungesat e tij do të ndihen gjithashtu në La Liga, ku do të humbasë takime të rëndësishme ndaj Sevillas, Betisit dhe Alavésit.
Ky dëmtim vjen pas rikthimit të tij në ekip, për shkak të problemeve të mëparshme muskulore që kishte pasur në shtator. Në të njëjtën ndeshje, edhe mesfushori Eduardo Camavinga u largua i dëmtuar, mirëpo duket se ai ka pësuar një dëmtim më të lehtë. Camavinga ka një shtrembërim të lehtë në kyçin e këmbës së majtë dhe deri tani nuk është përjashtuar nga sfida e së dielës ndaj Celta Vigos në “Bernabéu”.
Ai do të nënshtrohet testeve për të vlerësuar nëse do të jetë në gjendje të luajë në takimin e radhës në kampionat. Situata në ekipin e Real Madridit ngjall shqetësime te tifozët, pas rikthimeve dhe dëmtimeve të papritura të lojtarëve të rëndësishëm.
