Në Madrid bëhen gati për të hapur një faqe të re, një kapitull të ri post Ancelotti. Më 26 maj pritet të bëhet zyrtare trajneri i ri, Xabi Alonso.
E përditshmja spanjolle, Marca zbulon se Alonso do të firmos një kontratë 3-vjeçare, ndërsa do të nis menjëherë punën për të përgatitur ekipin në kuadër të Botërorit për Klube.
Ndeshja debutuese e tij në stolin e Realit do të jetë më 18 qershor përballë Al Hilal. Për Alonson ky është një rikthim në shtëpi pasi ka qenë pjesë e Realit nga viti 2009 deri në vitin 2014.
Në 5 vite në Madrid, Alonso fitoi 1 titull në La Liga, 2 Kupa të Mbretit dhe një Superkupë në Spanjë, por mbi të gjitha një Champions League, e cila ishte historike pasi bëhej fjalë për trofeun e 10-të.
Vjen Alonso, por nga Madridi largohet një tjetër ikonë, një legjendë e gjallë si Luca Modric. Klubi dhe lojtari njoftuan se ky është sezoni i fundit i tij në Madrid.
Modric largohet me 28 trofe në 13 vite, dhe një “Top të Artë” në CV e tij. Të shtunën në “Bernabeu”, tifozët e Realit do t’i japin lamtumirën një prej ikonave më të çmuara të klubit.
Nuk është ende e qartë se cila do të jetë e ardhmja e Modric, por në Kroaci, trajneri Dalic shpreson që Modric t’i udhëheq edhe në Botëror, i cili do të jetë i fundit për të.
