Ngjarja e pezullimit të volejbollistes braziliane Nayara Ferreira nga ekipi Dinamo ka bërë jehonë edhe në mediat braziliane. Ferreira, e cila ka një karrierë të gjatë në volejbollin profesionist, është pezulluar përkohësisht pasi refuzoi të kryej testin e verifikimit të gjinisë, një kërkesë e Federatës Shqiptare të Volejbollit (FSHV) pas ankesave nga disa ekipe rivale që dyshonin për identitetin e saj gjinor.
Sipas portalit brazilian “melhordovolei.com.br”, ky pezullim është përcaktuar si një akt i mbushur me paragjykime dhe transfobi, përkundër faktit se Nayara identifikohet si grua cisgjinore. Ajo ka shprehur pakënaqësi për këtë situatë duke theksuar se nuk kishte përjetuar kurrë një situatë të tillë në karrierën e saj 15-vjeçare. Volejbollistja 32-vjeçare, e cila ka luajtur në liga të ndryshme në shtatë vende, tha se është e dhimbshme të vihen në dyshim aftësitë dhe identiteti i saj.
Pezullimi erdhi pas disa ankesave të bëra nga ekipet kundërshtare, të cilat pretendojnë se Ferreira kishte kaluar në një tranzicion gjinor, duke bërë atë të papërshtatshme për kategorinë e grave. Si pasojë, federata ka kërkuar teste mjekësore për të sqaruar situatën dhe ka premtuar se do të japë një shpjegim zyrtar në ditët në vijim.
Mediat janë duke ndjekur ngjarjen nga afër dhe pretendojnë se do të përditësojnë informacionet sapo të publikohen detaje të reja nga palët e përfshira. Kjo ngjarje ka ngritur pyetje të shumta mbi praktikat e testimit të gjinisë në sport dhe ndikimin e tyre në karrierën e sportistëve.
