Ndeshja Serbi-Shqipëri për Kualifikimet e Botërorit 2026 në Leskovac
Nesër në mbrëmje, qyteti i Leskovacit do të mirëpresë ndeshjen kualifikuese për Kampionatin Botëror “FIFA World Cup 2026” ndërmjet përfaqësueses së Serbisë dhe Shqipërisë. Aktalisht, Shqipëria kryeson grupin K me 8 pikë, ndërsa Serbia ndjek me 7 pikë, duke e bërë këtë përballje tepër të rëndësishme për të dy skuadrat.
Për shkak të tensioneve të mëparshme dhe ngjarjeve të rënda që ndodhën gjatë ndeshjes së 14 tetorit 2014 në Beograd, autoritetet serbe, në bashkëpunim me UEFA-n dhe Federatën Serbe të Futbollit, kanë vendosur masa ekstreme sigurie. Kjo ka çuar në vendimin për zhvillimin e ndeshjes në Leskovac, një qytet me rreth 58 mijë banorë, dhe ndeshja do të luhet në Stadiumin e Qytetit “Dubocica” me kapacitet prej rreth 8 mijë vendesh.
Ngjarja do të jetë e mbyllur për publikun e gjerë, pasi biletat nuk janë shitur. Të pranishmit janë të thirrur me ftesa zyrtare në mënyrë që të sigurohet një atmosferë e kontrolluar dhe pa incidente.
Masat e sigurisë janë të jashtëzakonshme. Delegacioni shqiptar ka mbërritur në aeroportin e Nishit me një avion të kompanisë Air Albania dhe është drejtuar menjëherë drejt hotelit të akomodimi, pa kaluar nëpër procedurat standarde të kontrollit kufitar. Rruga për në hotel është mbajtur e hapur vetëm për ta, dhe hoteli është rrethuar nga forca të policisë dhe ushtrisë.
Sot, Kombëtarja Shqiptare ka zhvilluar seancën e saj zyrtare të stërvitjes në stadiumin e ndeshjes, dhe zona përreth stadiumit është nën masa të rrepta sigurie dhe e izoluar për publikun.
Deri tani, situata ka qenë e qetë, dhe autoritetet shpresojnë që atmosfera e qetë të vazhdojë edhe nesër, në mënyrë që të fokusohen vetëm te sporti. Të gjithë shqiptarët presin me entuziazëm dhe shpresë për një fitore të madhe në këtë sfidë vendimtare.
