Në fjalën e tij përmbyllëse në mbledhjen e Grupit Parlamentar të Partisë Socialeiste, Kryeministri Edi Rama adresoi çështjen e Televizionit Publik Shqiptar (RTSH). Ai theksoi nevojën për riformatim të tij, duke sugjeruar mundësi si mbyllja, privatizimi apo partneritetet. Rama shprehu shqetësimin se RTSH nuk mund të vazhdojë në formën aktuale dhe se, nëse nuk ka ndryshime, do të ketë pasoja në financimin nga taksat.
Kryeministri u shpreh se përpjekjet për reformimin e televizionit publik kanë dështuar, teksa e cilësoi bilancin e tij si një dështim i suksesshëm. Ai tha se nuk ka ndjekur RTSH pas viteve ’90 dhe e ka cilësuar televizionin publik si një shërbim mizerabël që nuk meriton mbështetje financiare nga qytetarët. Rama sugjeroi që RTSH të kërkojë ndjesë nga publiku dhe të angazhohet për përmirësim para se të rikthehet në ekran.
Ai gjithashtu komentoi se televizionet private, pavarësisht buxheteve më të vogla, arrijnë sukses të madh duke punuar çdo ditë për ta garantuar financimin e tyre. Në kontekstin e transmetimit të ndeshjeve të Kombëtares, ai theksoi se RTSH duhet të paguajë për të drejtat e transmetimit dhe se deri sa të mos arrijë standarde, nuk do të ketë mbështetje nga taksat e shqiptarëve.
Përfundimisht, Rama theksoi se çdo opsion për të ardhmen e RTSH duhet të jetë në tryezë, duke përfshirë mbylljen përfundimtare, privatizimin apo partneritetet, por theksoi se nuk do të marrë pjesë në procesin e vendimmarrjes për të ardhmen e tij.
